Kolbrún DeLux

Gleðilega jólahátíð

2009-12-23T11:51:00.005Z

og njótið Guðs friðar og blessunar á nýju ári

Og ég ber ríkidæmið með mér...

2009-11-20T18:40:00.004Z

Ég uppgötvaði eitt í dag. Var að lesa þessa hræðilegilegu frétt á mbl.is

og það er ljótt að segja það en ég gladdist smá í hjartanu.

http://www.mbl.is/mm/frettir/erlent/2009/11/20/myrtu_folk_og_seldu_vefi_i_fegurdarlyf/

Ég er gullnáma!

Ég lúri á gulli, sit á gulli og ber ríkidæmi með mér. Halló..... 15.000 dollarar fyrir 1 lítra af fituvef....hó hó hó..... Þó fitusog sé ekki alveg gefins, þarf nú ekki að sjúga marga dropa til að hafa uppí kostnaðinn. Ég er greinilega miklu efnameiri en ég hafði gert mér grein fyrir. Ætla að hafa þetta í bakhöndinni ef harnar mikið í ári.

Ég vona bara að Steingrímur fatti þetta ekki og leggi stóreignaskatt á bústnar og búsældarlegar miðaldra konur.

2009-11-02T17:48:00.005Z

Ég keypti kjötfars og hvítkál í dag, í tilefni þess að rannsóknir sýna að maður verður þunglyndur á að borða unnar kjötvörur. Ég mun kenna móður minni alfarið um geðheilsu mína framvegis, þar sem kjötfars var oft og títt á borðum á heimili mínu þegar ég var barn og mér þykir það ákaflega góður unninn matur.

Sorglegt en satt, þá þekkti appelsínugula unglingskassadaman ekki hvítkálið og þurfti aðstoð reyndari og eldri konu (mína) til að bera kennsl á hausinn.

Það er margt skemmtilegt að gerast þessa dagana, þó mér þyki nánast grátlegt hvað barnalánin eru mikil barnaólán og velti fyrir mér hvort foreldrar séu fífl...kannski ekki allir foreldrar en sumir.

En ég legg ekki meira á ykkur í bili. Jólin eru alveg að koma ;)

Jólaævintýri

2009-10-06T08:56:00.003Z

Um kvöldmatarleytið í gær, þegar ég og Dofri voru bæði komin í náttfötin og nýbúin að borða fiskinn hringdi síminn.

Jólasveinninn var í símanum og sagði farir sínar ekki sléttar. Hann var að koma af fjöllum en missti af fjalla-strætó! Hann sagði okkur líka að það moksnjóaði úti.

Ég og Dofri rétt náðum að hemja okkur í jólaundirbúningsæsingnum, nema hvað okkur (lesist mig) langði að hitta jólasveininn aðeins og taka forskot á jólasæluna, svo við ákváðum að stökkva út á náttfötunum, fara í bíltúr og leita jóla uppi.

Í kafhríð keyrðum við uppá hálendi Kópavogsbæjar og mitt í kafhríðinni sáum við mann.....nei..það var víst ruslapoki sem hafði vafist um ljósastaur...svo við keyrðum lengra, og stuttu seinna fundum við jólasvein í fullum skrúða, snjóhvítan og blautan.

Þegar heim var komið þíddi ég jólasveininn upp, kveikti á kertum, Dofri spilaði á gítar og við höfðum kósíkvöld.

*Voðalega hlakka ég til jólanna....og að komast í tæri við vetrardekkin mín sem eru veðurteppt norður í landi**

Skvísudagar í haustlitum

2009-09-24T19:02:00.004Z

Vordís rukkar sögur úr húsmæðraorlofinu eða Skvísudögum eins og helgin heitir opinberlega. Það er miklu meiri glamúr yfir því nafni.

Helgin var skemmtileg, ég fór með 6 bjóra með mér og kom heim með 5. Þá er gaman ;o)

En því miður Vordís, What goes around in húsmæðraorlof stays in húsmæðraorlof!... þannig að sögurnar af því hver var með mestu loðnuna, hver átti kjánalegustu söguna af eiginmanninum eða hvaða perraskapur viðgengst við hinar ýmsu daglegu athafnir munu haldast meðal grúpppíanna og ekki fara lengra.

En ég get svo sem upplýst að mér finnst ég töluvert nánari einni vinkonu minni eftir þessa helgi en áður þar sem við deildum bæði rúmi og tannbursta. Ef ég væri lesbía værum við eflaust giftar, eða... on second thought.... líklega ekki, því þó ég væri lesbía væri hún það líklega ekki og því líklega bara gift gaurnum sem hún er gift en ég kannski bara piparlesbía. *Smá vangaveltur*

En ég föndraði 2 lampa í orlofinu, kláraði einn bútasaumsdúk, gerði við skó og svefngrímur og bjó til 2 gullfalleg jólakort svo eitthvað sé nefnt.......svona á milli pottaferða...og hörpuskelsmáltíða.

Stundum er dásamlegt að kæra sig kollótta um einhverja kreppu og gera sér dagamun með frábærum vinkonum.

Greyjið meinti fjársvikarinn

2009-09-17T21:29:00.003Z

Heyrði viðtal við meintan fjársvikara í sjónvarpsfréttunum í kvöld, þar sem hann lýsti lífi sínu eftir að breska lögreglan hafði hendur í hári hans. Hann var laus úr fangelsi á tryggingu, en líf hans var ömurlegt. Hann þurfti að vera heima hjá sér frá kl 10 á kvöldin til 7 á morgnana. Mæta á lögreglustöðina í hverfinu á hverjum morgni og má ekki yfirgefa landið.

Ég er nú ekki grunuð um fjárglæpi, en ég get ekki séð að þessi maður hafi það nokkuð verra en ég, þannig séð. Ég er heima frá 10 -7 og fer í vinnuna á hverjum morgni í hverfinu og hef ekki efni á að fara til útlanda. Svona næstum eins og allir heiðvirðir Íslendingar.

En hver átti 10 mills til að borga hann út??

PS. Skvísuorlofið hefst á morgun. Ég ætla að vinna keppnina um loðnustu leggina þetta árið og hef safnað alveg síðan í fyrra......vvvííííí..... ÉG hlakka svo til.....

Gullkorn dagsins..

2009-09-14T18:59:00.008Z

Heyrði konu í útvarpinu sem kvartaði yfir því að eini starfsmaðurinn sem hún sá "inni" í Hagkaup hefði verið gína (fyrir utan stúlkuna á kassanum sem vann við að taka við peningum). Mér fannst það fyndið. En það var líka fyndið þegar þáttastjórnandinn spurði hvort margir viðskiptavinir hefðu verið í búðinni. Konan svaraði " nei, það voru örfáir, einstaka á stangli, mátti telja þá á einum fingri"!

En svo ég klemmi röddina og kvarti, þá hef ég oft lent í því að Hagkaup hafi bara gínur sem starfsfólk inní búðinni. Það er etv aðeins viðráðanlegra heldur en lifandi starfsfólk og situr og stendur eins og verslunareigendur vilja!!

Ps. þessar gínur virðast vera frekar þreyttar á vinnunni og pirruðum viðskiptavinum... Dálítið fúl-lyndar.

Heima er best

2009-09-10T17:07:00.003Z

Blóðbankinn vill ekki innleggin frá mér og ég er hætt að geyma peninginn minn í hinum bönkunum, enda á ég engan pening. Ekkert blóð og enginn aur! Þarf þá ekki að hafa stórar áhyggjur af þessu "mig langar til útlanda" syndromi, þar sem aurinn fyrir farmiða er ekki til, sumarfríið er búið og ég mun líklega detta niður, nýlent á flugvelli í útlöndum af blóðleysi og verða flutt á sjúkrabörum heim aftur. Þannig að ég er búin að sannfæra mig um að heima er best. Í tilefni þessarar uppgötvunar, ætla ég að kveikja á kertum, setja ljúfa tónlist á og hafa það huggó.

Kóngafólkaleiðindi

2009-08-24T20:53:00.002Z

*Geysp*

Ég er svakalega hrifin af kóngafólki og Royalnum í Evrópu og hef reynt að halda merki nöfnu minnar Kollu frænku í Löngumýri (blessuð sé minning hennar) og vera vel upplýst í slúðrinu um Játvarð og Fredrik, Haakon og Karl, Mette og Viktoriu og Mary og Marie. Kolla frænka keypti nefninlega útlensku slúðurblöðin og vissi allt um ástarmál og skandala heldra fólks.

Með tilhlökkun í brjósti hef ég sest niður á mánudagskvöldum og gert heiðarlega tilraun til að horfa á svokallaða heimildarmynd um breska kóngafólkið en ég hef aldrei náð að halda meðvitund við viðtækið svo lengi að ég sé búin að finna út, hvað þetta fólk gerir dags daglega. Þetta er ömurlegt kóngafólk. Ég fullyrði hér með að ég lifi skemmtilegra og áhugaverðara lífi en Kalli og synir, gamla skrukk og drottningarkarlinn hennar.

Held ég taki niður myndina af (kónga)fjölskyldunni minni sem hangir á ísskápnum....og setji mynd af skemmtilega fólkinu.... mér í staðinn.

fjörður..fjörður..fjöður...fjörðrur....

2009-08-15T17:54:00.003Z

Loksins, loksins heyrist hljóð úr horni. Gamla komin heim eftir útlegð sumarsins, þar sem margir firðir voru heimsóttir. Nýji bíllinn fór með mig marga góða rúnta og hef ég tínt til þá firði sem skoðaðir hafa verið. Prófið að lesa þetta upphátt eins hratt og þið getið.

Kollafjörður hinn syðri (líklega nefndur í höfuðið á mér)
Borgarfjörður
Hrútafjörður
Miðfjörður
Húnafjörður
Skagafjörður
Eyjafjörður
Bitrufjörður
Kollafjörður hinn minni á ströndum
Steingrímsfjörður
Þorskafjörður
Berufjörður
Gilsfjörður
Hvammsfjörður
Stöðvarfjörður
Fáskrúðsfjörður
Reyðarfjörður
Eskifjörður
Norðfjörður

Ég svaf í skálum og tjaldi, húsum og sumarbústöðum, umkringd íslenskum fullum skáladólgum og friðelskandi útlendingum, og allskonar fólki. En fyrst og fremst var ég með fólkinu mínu, fjölskyldunni.
Sumarfríið mitt var yndislegt í alla staði, og ferðalögin vel lukkuð. Nú er ég komin heim og daglegt amstur er tekið við.....er reyndar aðeins að halda í sumrið og ætla að grilla í kvöld á svölunum.

Raftækjalausi dagurinn

2009-07-05T18:43:00.004Z

Nú er sumarfríið mitt loksins brostið á og til að halda uppá það fór ég alveg í KAST í gær. Blandaði lyfjakokteila eins og heimsins besti barþjónn og hélt mig innan dyra langt, langt frá sólinni. Vona að hausverkurinn minn sé ánægður með hve vel honum var sinnt í gær.

Ég er öllu betri í dag og alveg merkilegt hvað maður metur góða heilsu mikils, svona þegar maður upplifir vonda daga.

Ég stakk uppá því við Dofra að við myndum hafa tölvulausan dag í dag. Honum fannst það nú ekki vera honum neitt sérstaklega í hag, svo hann gerði betur og stakk uppá rafmagnstækjalausum dag. Honum fannst það ganga útyfir okkur bæði!

Úff..þetta var erfitt..

Ekkert morgunkaffi

Ekkert ristað brauð

Ekkert facebook

Engin sími

Ekkert heitt vatn í te..

Ekkert útvarp

Ekkert sjónvarp

....hvað gerir maður þá?

jú fer á bókasafnið og útréttar fyrir hálendisferðina á morgun og sannfærir einkasonin um að raftækjalausa deginum sé lokið þegar komið er heim.....

ÞAÐ TÓKST OG ÉG ER AFTUR KOMIN Á INTERNETIÐ...OG BÚIN AÐ HELLA UPPÁ KAFFI...... 2SVAR...

Við ætlum aftur að halda svona dag, og jafnvel halda hann út, allan daginn, í vetur, þegar verður dimmt og við þurfum að kveikja á kertum. Þá er planið að spila og hafa huggó...

En á morgun ætla ég uppí Landmannalaugar og svo norður yfir Kjöl með hr. Kópavogi. Mikið hlakka ég til að fara í smá ferðalag.

Fel ykkur Guði á vald í grátt brókarhald.

2009-06-29T20:16:00.004Z

Satistafrænka mín nuddarinn, fór ekki mjúkum höndum um stokkbólgnar herðar og háls áðan. En eitthvað er hún að gera rétt, því ég er bara allt önnur í vöðvabólgunni eftir örfáa tíma á bekknum. Skrítið hvað sumt vont getur verið gott. Samt er nú flest vont ekkert gott.

Veðrið er fáránlega gott í dag, og ég sem var að vona að VeðurGuðinn myndi spara góða veðrið þangað til í næstu viku, þegar sumarfríið mitt mun banka uppá. En kannski á hann extra mikið af því.

Dofrinn er kominn til elskulegu móður sinnar og þykir mér heimurinn allbetri þegar hann er heima. Er farin að hlakka til að sumarleifast með drengnum, útum allt land helst á kagganum góða.

Deili ekki fleiri leyndarmálum með ykkur að sinni. Over and out.

2009-06-25T20:59:00.003Z

Dýr jarðarinnar eða kannski frekar háloftanna hafa líst vanþóknun sinni á bílakaupum mínum og í dag var kúkað á bílinn minn! Einhver óprúttin lofthæna gerðist svo frökk að skilja eftir hvíta kúkaklessu á fallega nýbónaða jeppanum mínum. Hún hefur eflaust haldið að ég væri útrásarvíkingur, en ekki bláfátæk einstæð móðir sem hefur nurlað fyrir kagganum í mörg ár. Ég fyrirgef henni. Ég veit hvernig henni líður.

Annars er búið að plana fyrstu hálendisferð sumarsins á kagganum. Ekið suður á land til Víkur og þaðan uppí Landmannalaugar og þvínæst norður yfir Kjöl, heim til ma og pa. Þetta verður svona létt-fjallaferð. Ég hlakka alveg svakalega til, þó ég þurfi að sofa í tjaldi....já...jafnvel þó....

Djúpt sokkin heróínsjúklingur eða kona í raunveruleikanum?

2009-06-21T10:15:00.003Z

Mig hefur dreymt sama drauminn í nokkur ár núna. Að eignast jeppa, jafnvel bara lítinn jeppa, sem ég gæti skrattast á uppá smáfjöll þar sem ég er meira fyrir að keyra á fjöll en ganga.
Núna lít ég útum eldhúsgluggann á klukkutímafresti og skoða jeppann minn og til að vera viss um að ég sé í raunveruleikanum, þá klíp ég mig í leiðinni. Ég get svo svarið það að handleggirnir eru orðnir bláir og marnir eins og á djúpt soknum heróínsjúlkingi, af öllu þessu klípi.

But HE's mine....

*dæs* alveg ótrúlegt hvað dauðir hlutir geta gert mann hamingjusamann, ég hefði aldrei trúað því....

Gamla Elantran mín eignaðist gott heimili hjá góðlegum manni og þakka ég henni fyrir góða þjónustu.

Góðar stundir.

Kreppa-sveppa tínsla

2009-06-14T19:26:00.004Z

Fékk mér göngutúr í góða veðrinu í dag. Þegar ég rölti heim sé ég "eldri" borgara, virðulega dömu, líklega á níræðisaldri bogra yfir einhverju á miðri umferðaeyju hérna á Háaleitisbrautinni.

Svei mér þá ef hún var ekki bara að tína "ofskynjunarsveppi".

Hvað annað gæti hún hafa verið að gera? Ég velti þessu dálítið fyrir mér....

2009-05-17T20:21:00.002Z

Á dauða mínum átti ég frekar von en að við lentum í 2.sæti í eurovision. Tónlistarsmekkur minn er víst ekki sá sami og meginþorra evrópubúa, það er greinilegt. Mér finnst ennþá íslenska lagið ekkert sérstaklega skemmtilegt, en viðurkenni fúslega að flutningur þess tókst með afbrigðum vel. Sander hinn norski bræddi hins vegar hjarta mitt með einfeldni sinni....og besta lagið fannst mér þetta....

http://www.youtube.com/watch?v=r_EXeeAACwA

Svo á ég miða á Lhasa de Sela tónleika um næstu helgi......mikið hlakka ég til ;o)

HUNDAHALD og litlir hundar

2009-05-06T18:22:00.003Z

Heimsótti Ninnu mína eftir vinnu í dag og við kláruðum kínverska martraðarpúslið sem hún var að verða sköllótt yfir. Það var gaman, en í forstofunni niðri í stigaganginum var búið að hengja upp miða. Hann var svona.

ALLT HUNDAHALD ER BANNAÐ Í BLOKKINNI

líka litlir hundar

Mér finnst þetta fyndið...

Bófar...

2009-04-27T22:28:00.005Z

Af hverju datt mér Bjarnabófarnir í hug þegar ég sá Sigmund Davíð í fréttunum um daginn?

og þegar ég Gúgglaði Bjarnabófanana, birtust þessir herramenn...nei meina glæpamenn....

Kannski þarf Sigmundur bara að sofa aðeins meira til að losna við baugana.

Kannski þurfa banka-bófarnir að þvo sér með 1.000.000.000.000.000.000.000.000 grænsápum og vanish blettahreinsum til að fá hreina sál og losna við baugana.

Kannski eru Bjarnabófarnir í Andrés Önd viðkunnalegustu bófarnir í okkar samtíð.

fæðing í vændum?

2009-04-23T00:57:00.006Z

Ég er með bólu í andlitinu. Ég hef töluverðar áhyggjur af því að í nótt eða mjög fljótlega hljóti að fæðast fullvaxta dýr úrtúr kinninni á mér eins og í verstu hryllingsmyndum. Gott ef ég finn ekki fyrir töluverðum samdráttarverkjum í andlitinu.
Mér finnst ég vera orðin fullgömul til að fá unglingabólur.

2009-04-19T12:48:00.005Z

...hann stakk lyklinum í skrána og gekk innfyrir. Hann greip mig í faðm sinn og kyssti ástríðufullt. Ég kikknaði í hnjánum og leit augu hans sem voru full af þrá, ég fann fyrir líkama hans þétt upp við minn.......

....tja.. kannski var mómentið ekki alveg svona í gær þegar hr. Kópavogur mætti á svæðið, enda Rannveig vinkona í kaffi....... það hefði verið í hæsta máta óviðeigandi. Dofri var líka heima og svona móment bönnuð börnum..... En hann er alveg að standa sig maðurinn í þessu kærastadæmi.

Vorfiðringur er komin í kroppinn og í gær var umpottað og endurnýjuð pottablóm

Teknir afleggjarar af úr sér vöxnum plöntum og settir í vatn og sáð fyrir salati og kryddjurtum í fyrsta skipti úti á svölum.

Ég hlakka mikið til sumarsins.

Jeppafetis.....

2009-04-07T23:02:00.002Z

Mig langar alveg voðalega mikið í dverg-jeppa. Reyndar langar mig alveg líka í digur-jeppa en nenni bara ekki að danglast á Digrum innanbæjar og held að Dvergur myndi henta mér betur í snatt.
Svo kostar víst Digur meira en Dvergur og klinkið mitt dugar alls ekki fyrir Risa bíl. Það er líka voðalega 2007.

Er búin að sýna bílasölum óvenjulega mikinn áhuga undanfarna mánuði í von um að "sá eini rétti" dúkki upp (þe.bílinn, ekki bílasalinn). En þetta er dáldið eins og með mennina, að ég tek nú ekki hvað sem er.

Þeir segja að bílarnir endurspegli hvernig persóna þú ert. Ég veit nú ekki alveg um það. Ég hef átt allskonar bíla og held þeir segi lítið um mig. Í dag tók ég smá bílasölu rúnt með manni sem veit ekkert skemmtilegra en skoða bíla. Rákumst á svona Jeep Dverg. Hann var eitthvað svo ljótur en samt svo glimrandi sjarmerandi. Vantaði reyndar grindina framan á hann og kastarana, en mér datt nú í hug að hr. Kópavogur gæti nú bara gefið mér grindina í afmælisgjöf og kastarana í jólapakkann!! Það væri alveg svakalega rómantískt.....

En leitinni að hinum eina rétta er alls ekki lokið...og þar sem gamla elantran mín er spræk sem aldrei fyrr, mun ég halda strjúka henni eitthvað áfram.

2009-03-29T22:20:00.002Z

Heyrði sögu um helgina um mann sem fékk tannpínu og lagði sig. Honum var batnað þegar hann vaknaði daginn eftir.

Í gærkvöldi var mér illt í einni tönn, lagði mig og var batnað þegar ég vaknaði daginn eftir.

Dekur, dúll, nudd og nautnir er góð lýsing á gærdeginum. Hvítvín í hádeginu, nudd í heitum potti, andlitsböð og steinanudd er eitthvað sem ég er til í að upplifa miklu oftar en ég geri.

Til að viðhalda lærapokum og magakeppum hélt svallið áfram í Grafarvoginum fram undir miðnætti.

Þetta var svo erfiður gærdagur, að ég hef notað daginn í dag að mestu í slökun og hvíld *dæs*

2009-03-25T20:20:00.003Z

Ég sá hóp af appelsínugulum unglingsstelpum í dag í glimmergammósíum.

Voðalega finnst mér brúnkukremin illa lukkuð nú til dags.

Má ég þá frekar biðja um þennan fallega ná-lit sem við vinkonurnar berum af stakri prýði lungann úr árinu.

Um gildi þess að gera ekkert!

2009-03-23T20:35:00.004Z

Las færsluna hans Sr. Svavars hér til hliðar um gildi þess að gera ekki neitt. Ég er honum sammála. Mér finnst gott að gera ekkert.

Um síðustu helgi brugðum við Kópavogur okkur í bústað með börnin....að gera akkurat ekkert!

Snjáldurbókin og bloggsíður skildar eftir heima, ásamt mbl.is.

Hvað er hægt að gera í órafjarlægð frá veraldarvef?

1. Búa til snjóbolta og stinga inná rassinn og hoppa útí heitapottinn og búa til 3 brjóst.

2. Fara í keppni um hver getur legið lengst ber í snjónum eða eins og við gamla fólkið, hver gæti setið lengst í sólstólunum fullum af snjó (ég vann!)

3. Spilað laumu

4. Spilað Catan

5. Farið út í ausandi rigningu og spilað Mini-Golf þar sem allir voru sigurvegarar

6. Gengið í drulluleðju upp undir miðja kálfa meðfram Hvítá (rómantíkin blómstraði í pyttinum)

7. Fleytt kerlingum á ánni

8. Elduð dýryndis steik og meðí...

9. Sofið vel og lengi

10. Lesið Brennu-Njálssaga og endursögð í húslestrastíl og rýnt í gamlar gestabækur

Held að við ættum að gera meira af þessu......

getur grís verið fiskur?

2009-03-17T21:54:00.002Z

Steikti grísa-kreppýnettur í kvöldmatinn í kvöld að gömlum sið, með mús og grænum ora. Þær hafði ég fengið syndsamlega ódýrar svo ég neyddist til að setja poka í körfuna.

Eldamennskan tókst nú ekki betur en svo að hvorki Dofri né Þorsteinn vinur hans höfðu smekk fyrir þessu fína "kreppý eldhúsi" og þegar ég barðist við að koma ósómanum ofan í drengina sagði Dofri "mamma, mér finnst þessi fiskur ekkert góður".

Þetta er nú meira ruglið....

og enn er eftir í pokanum.....veit ekki hvernig í veröldinni ég ætla að koma seinni hlutanum í lóg.... ætli ég geti dulbúið matinn í eitthvað sja-du-la-vals dæmi??

2009-03-15T22:09:00.004Z

Jæja.. þá hef ég sóað lífi mínu þessa helgina.

Ryk-vefirnir eru á bak og burt og húsið ilmar af klósetthreinsiefnum!

Fötin í kommóðunni minni og fataskápnum hans Dofra eru ekki lengur eins og þau hafi verið í þeytivindu eða hrærivél heldur brotin fallega saman.

Eins og þráhyggjusjúklingur hafi farið hamförum á heimilinu.

Til að fullkoman þetta frábæra ævintýri fór ég í dag og keypti blettaeyði frá Helvíti og mýkingarefni frá Djöflinum. Ég sé ekki fram á að ég geti með nokkru móti hætt þessu þrifæði..... Er einhver sem getur bjargað mér frá þessu böli?

2009-03-12T23:13:00.003Z

Maður gerir oft heimskulega hluti þegar maður er ástfangin. Í kvöld "bauðst" ég til að fara með Hr. Kópavogi í kvöldgöngu að bera út áróðurspésa fyrir Samfylkinguna. Svona til að útskýra, þá ólst Addi upp í Hitlersæsku komma-Alþýðuflokksins og hefur ekki borið þess bætur síðan. Mér finnst það reyndar ágætt, þar sem ég er kommi innst inní mér, en aldrei myndi mér detta í hug að flokksbinda mig. Held það sé nóg að vera flokksbundin Jesú, í þjóðkirkunni, þó ég færi ekki að flokksbindast öðrum Guðum.

En kvöldgangan var bara næstum því rómantísk þó Kata Júl og fleiri kvennsniftir væru að flækjast fyrir í göngutúrnum í bælingaformi.

Þegar við komum heim með kalna fingur (sem þurfti nánast að fjarlægja vegna dreps), var Hr. Kópavogur svo huggulegur að hita kakó og færa mér til að koma örlitlu lífi í kroppinn minn. Honum finnst betra að ég sé á lífi og gefi frá mér lífsmerki.

Ég sé fram á þá tíð að ég geti sent hann í kristniboðsferðir um Kópavoginn..... svona í staðinn fyrir útburðinn....

2009-03-09T21:38:00.002Z

Thelma og Louise stukku uppí trukkinn hans Gísla og hentu börnunum afturí á föstudaginn og brunuðu norður til Akureyrar.

Gísli græjaði jeppann, allir naglar fasti, rafgeymir hlaðinn, og stelpurnar klárar fyrir "drátt" ef illa færi með spotta og skóflu.

Helgin var stutt en skemmtileg. 70 ára afmæli, leikhús, nýbakaðar kleinur hjá Þóru frænku og kaffihúsaferðir (ótrúlegt hvað maður getur gert margt á einum degi).

Heimferðin var hverjum trukkaökumanni öfundunarefni, þar sem ég náði að festa mig létt í skafli (fékk þó engan dráttinn) og aksturinn suður yfir heiðar var tafsamur og lýjandi vegna bandbrjálaðs óveðurs.

Í smekkfullum Staðarskála voru gáfulegir menn teknir tali og vitrænar umræður voru allsráðandi um veðurfar á Holtavörðuheiði og hvort ráðlegt væri að klífa yfir fjallið að svo búnu.

Eftir þónokkar vangaveltur og viðræður við neyðarkalla á staðnum og í síma, ásamt símtali við Hr. Kópavog sem saknaði mín til dauðs (líklega) ákváðum við að láta slag standa.

Jósteinn neyðarkall hoppaði uppí björgunarsveitarlandroverinn sinn og helmingur ferðalanga úr Staðarskála fylgdi honum eftir yfir heiðina í diskóljósum hvers annars ásamt Kristjáni Möller á blankskónum og stuttermabolnum. Var búin að heita mér því að biðja hann um að ganga á undan, ef færi svo, því hann samgönguráðherrann var líklegast sá verst búni maður til fjallaferða sem ég hef séð (svona fyrir utan flotta jeppann).

Anyhow.... yfir fjallið leiddi Jósteinn hjörð sína og Hr. Kópavogur beið með steik handa okkur stelpunum þegar við komum í bæjinn í gærkvöldi. Ég get svo svariða að ég hafði mig varla úr fötunum áður en ég var sofnuð á koddanum í gærkvöldi.

Mikil svakaleg trukkalessa er ég!!

Bad hair day..eða var það kannski bad bus day..

2009-03-04T21:31:00.003Z

Dagarnir eru misjafnir. Ég átti alveg ljómandi fínan dag en Hr. Kópavogur vaknaði og lifði í martröðinni í dag þar sem hver hörmungin rak aðra.

Ég geymdi Hr.Kópavog heima hjá sér í gærkvöldi þar sem hann sinnti henni Mörtu sinni í HR af einstakri aðlúð langt fram á nótt og náði loksins að skila verkefni til hennar seint um síðir. Þegar klukkan loksins hringdi var hann alls ekki tilbúin fyrir amstur dagsins og svaf yfir sig. Ég fékk nokkur sms í dag:

Ekki byrjar dagurinn vel. 2urinn minn er bara á hálftíma fresti eftir 9. Og hér stend ég úti á Kópavogsbrú og bíð þá í korter eftir næsta vagni. Eins gott að Marta vinkona þín samþykki verkefnið mitt. Annars þarf ég að finna út hvar hún á heima og mun halda vöku fyrir henni á næturnar með búsáhöldum.

....en Addi komst í strætó og léttist á honum brúnin, ég held hann hafi verið feginn að komast inní hlýjuna...og ég fékk sms...

Nú er ég komin í 2inn með rauðvínsglas og einkabílstjóra. Guð hvað náttúran er falleg og lífið sjálft brosir við mér.

Hann hafði ekki alveg rétt fyrir sér...en fínt að halda að lífið sé gott í augnablik. Þegar vinnudeginum hans var lokið fékk ég sms.

Anna klúðraði þessu. Ég missti af vagninum. En það kemur annar eftir nokkrar....

og ég fékk annað sms

Jæja nú tekur eitt ruglið enn við. Ég stökk uppí leið 15 sem á að enda hjá Versló. Skrattinn fer uppí Mosó fyrst. Ég veit ekki hvort ég þori að hitta þig í dag.

og svo fékk ég enn annað sms

Sennilega átti ég að taka 14 en ekki 15!

og nú var síminn minn að fyllast af örvæntingarfullum Kópavogsbúa.

Djókið ætlar ekki að enda. Mér var vísað út úr vagninum í Mosó á endastöð einhversstaðar í rassgati. Næsti vagn kemur eftir 12 mín. Þetta er martröð líkast!

En Addi komst aftur í bæjinn, búin að kynna sér strætóleiðir bus.is, missti af Mörtu í skólanum, af því hann var á rúntinum en er nú kominn í hús og ég er búin að vera voðalega góð við hann.

Ég vona svo sannarlega að það fari ekki allt í hund og kött í kvöld.

Smælingjar

2009-02-28T21:20:00.005Z

Smælingjar eru skemmtilegt orð yfir okkur litla fólkið í samfélaginu. Ég er orðin svo alþjóðavædd að mér finnst orðið eiga betur við einverjar glaðbeittar verur, frekar en kengbogna og beygða Íslendinga sem eru svo smáir að engin tekur mark á þeim lengur. Einu sinni vorum við STÓR....eins og risastórar sápukúlur.

Mæli með því að þetta orð verði notað meira, minnir mig dáldið á kartölfur....... smælki. Kannski eru við eins og kartölfur.....og við mömmurnar dáldið fúlar og linar....

Ég er líklega smælingi.

2009-02-24T11:08:00.004Z

Hausinn minn ákvað að vera steiktur í dag. Ég reyni að streitast á móti og fæ mér bara súkkulaðihúðaðar hrískökur með rjóma og kaffibolla í tilefni dagsins.

Það er býsna gott að vera fyrir norðan á hótel ma og pa, þó pa sé víðsfjarri, í fullri þjónustu á sjúkrahúsinu en þangað var hann fluttur fyrir nokkrum dögum mjög minna hressari en oft áður. Ég bið þess óskaplega að hann hressist aftur og komi heim til mömmu. Kata sys er með kenningu (pabbi og vinur hans eru báðir á lyfjadeildinni). Hún heldur því fram að þetta sé plott, að þeir hafi ákveðið að fá sér strákahelgi á hóteli FSA! Kalli kom svo í heimsókn til þeirra um daginn og þá vantaði bara einn í karlaklúbbinn. Flott plan hjá gömlu körlunum.

Lífið er svo skrítið. Í gær hefði ég átt að verða mamma aftur ef allt hefði gengið að óskum. Ég hefði alveg kosið það, þrátt fyrir allar kreppur, en í staðinn er ég alltí einu stödd heima hjá þeim gömlu og pabbi á sjúkrahúsinu en ekki ég. Í tilefni dagsins fór ég að skoða gömul myndaalbúm af fjölskyldunni. Það var skemmtilegt. Ég var greinilega brúnaþungt og fallegt barn! En einstaklega glaðvær og....... óþekk með eindæmum......segir MAMMA....

PS. Kata er þessi glaða og ég er við það að kasta upp af leiðindum sýnist mér, yfir útiveruhugmyndum móður minnar!

Ritræpan er við hestaheilsu, en bara fjarverandi.

2009-02-18T19:07:00.006Z

Ritræpan hefur ekki verið að drepa mig undanfarnar vikur. Kannski ættu æðstu menn landsins að líta til húsmóðurinnar á Háaleitinu og taka hana sér til fyrirmyndar. Þeir virðast endalaust senda frá sér misskilin skilaboð. Kannski heitir Óli ekki Óli Raggi, heldur Óli Goggi, því hann og hans fjölskylda eru títt mistúlkuð og misskilin. Kannski er þetta fylgifiskur þess að búa í fjölmenningarfjölskyldu. Ég velti því fyrir mér. Össur og Davíð hafa lítið haft sig í frammi, ætli það hafi verið stungið tusku uppí gúllann á þeim?
Ég segi ekki meir!

...jú..eitt... stóra sys á afmæli í dag. Til hamingju með daginn ;o)

2009-02-13T16:48:00.010Z

Mér finnst ótrúlega pirrandi þegar menn pissa útfyrir.

Mér finnst gott að Hr. Kópavogur setur á könnuna á morgnana og það er notalegt að drekka morgunkaffið með honum áður en dagurinn byrjar.

Ég lofaði ókunnugri konu á Akranesi að senda henni munstur af útsaumskortum, þegar ég kæmist í góssið hennar mömmu.

Páll Steingrímsson, minn uppáhalds, hringdi í dag og bauð mér í bíó eftir viku að sjá nýju myndina sína. Ég ætla að þekkjast boðið.

Nú er komin helgi og loksins er leyfilegt að henda tánum uppí loft. Í kvöld er planið að tæla Kópavogsbúann og á morgun er Eurogeim.

http://www.youtube.com/watch?v=7Ur_PUrQfQ8

Ég er sökker fyrir lélegu popp-rokki... Áfram Elantra..nei.. það er bíllinn minn... Áfram Elektra!

Fel ykkur Guði á vald í grátt brókar hald.

Ég sef með???

2009-02-04T17:33:00.004Z

Teri Hatcher sefur "með" hundi!

http://www.mbl.is/mm/folk/frettir/2009/02/03/sefur_med_hundi/

Ég sef með svefngrímu og hef yfirleitt tvær til þrjár á náttborðinu hjá mér. Ég sef líka yfirleitt "með" úrið á mér. Velti því fyrir mér hvort Teri breiði hvutta yfir andlitið eða vefji honum um fingur sér. Stundum sefur Dofri "hjá" mér í afleysingum þegar hr. Kópavogur er vant við látinn og vefur þá litlu strákahöndunum um háls mér og kyssir mig góða nótt á nefbroddinn.

Þetta er allt voða undarlegt, sef ég með eða hjá? me eða mjá?

Hvað gerið þið?

2009-01-28T20:01:00.002Z

Horfði á fréttirnar. Kona í Ameríkunni eignaðist áttbura og ætlar að hafa þá alla á brjósti. Velti því fyrir mér hvort hún sé með fleiri spena en konur almennt, þar sem ég horfði á systur mína með sín tvö á sitthvorum, lungan úr sólarhringnum fyrir nokkrum árum. Kannski þarf ammeríska áttburamamman ekkert að sofa, kannski drekkur hún Red Bull í öll mál og bryður Ginseng. En það sem var skrítnast við fréttina var að henni fylgdu fréttamyndir af risastóru bílastæði fyrir utan sjúkrahúsið. Ætli börnin séu geymd þar, á stóra planinu?

Annars kyngir niður snjónum. Mér finnst ákveðinn friður og ró koma með snjónum, þó hann sé kaldur og blautur. Vetrarstillur eru mér að skapi. Held líka að Vinstri-stjórn verði mér að skapi. Allavega vona ég það svo innilega. En það sem myndi kæta mig svo mjög og jafnvel mest, væri ef hægt væri að ná í rassgatið á þessum drulludelum sem komu okkur á hvínandi kúpuna!!

2009-01-24T11:03:00.002Z

Kata sys kom í öryrkjagírnum á stofusófann til mín í gærkvöldi eftir viku dvöl í þúsund-vatnalandinu þar sem hún hitti bæði konu all-klára sem heitir Meri og aðra frekar ófríða sem heitir Æla. Hún var þó ekki illa lyktandi að sögn. Veit ekki hvort Kata lenti í köldum vötnum þarna úti, en allavega er hún gaddfreðin og föst og getur sig ekki hreyft vegna þursabits í hálsi. Nú hallar hún undir flatt og segir "já" og gefur bendingar með augngotum. Það fyrir gott fyrir mig, því þá get ég valtað yfir hana óhindrað. En verra er að ég þykist vita að fljótlega þurfi að að aðstoða hana við frekar prívat athafnir eins og losun lífræns úrgangs. En auðvitað græjum við systur það eins og allt annað. Doktorinn mætti í morgunkaffi í morgun og saman drógum við freðnu konuna við illan leik uppá tvo jafnfljóta, eða hæga frekar. Nú er ég búin að dópa sys upp og vonandi mýkist hún eitthvað þegar líður á daginn, svo ég geti sent hana norður í land til mannsins sem strengdi heitin um ævarandi umhyggju henni til handa.

Stolt

2009-01-20T21:38:00.003Z

Loksins, loksins er doðinn og deyfðin rokin úr þjóðinni. Mér þykir það merki um bata, þegar ég sé fjölda manns rísa upp gegn óréttlæti, spillingu og rugli. Síðustu ár höfum við látið allskonar bull yfir okkur ganga í skjóli góðæris án þess svo mikið sem opna munninn, öllum virtist vera sama. Hver í sínu horni. Ég fylltist þjóðarstolti þegar ég sá allt fólkið á austurvelli í dag. Við erum vöknuð! Vonandi sofnum við ekki alveg strax aftur. Einn orkudrykk á mann í boði Glitnis, Kaupþings og Landsbankans......

Barnaþrælkun á Íslandi

2009-01-19T21:42:00.003Z

Dofrinn minn kom heim í dag og gleðst ég óskaplega yfir því að geta kúldrast með þessu hálffullorðna barni næstu vikuna. Við erum búin að spjalla dáldið, syngja skátalög og lesa, en mestur og verstur þótti Dofra heimalærdómurinn, sem var afskaplega glaðlegur, upplífgandi og kátínugefandi eða NOT. Svona hljómaði textinn sem Dofri átti að apa upp í stílabókina sína.

"Íslendingar hafa alltaf veitt fisk úr sjónum. Fyrst réru menn til fiskjar á litlum árabátum, síðan bættust skútur við, þá litlir vélbátar og síðar stærri og fullkomnari skip með sífellt afkastameiri veiðarfæri. Áður fyrr veiddur stórir flotar erlendra veiðiskipa fisk við strendur landsins en nú ráða Íslendingar sjálfir yfir stóru svæði í kringum landið og stjórna þar veiðunum. Miklar framfarir hafa líka orðið í fiskvinnslunni"

Náði einhver að lesa alla leið án þess að deyja úr leiðindum? Þeir sem dóu, rétti upp hönd! Gott ef hann Georg Bjarnfreðarson hafi ekki samið þennan texta.

Á meðan Dofri var að troða stöfunum í stílabókina var þáttur á Rúv-inu um barnaþrælkun og ég læt útúr mér "greyjið börnin, látin vinna 17 tíma á dag". Þá fussar í Dofra og hann segir "kva....er það eitthvað meira en það sem ég er í skólanum?"

... ætli sé stunduð barnaþrælkun í grunnskólum landsins. Námsefnið svo þurrt og leiðinlegt að 6 tíma skóladagur verður að 17 tíma barnaþrælkun í hugum nemenda? Þetta útskýrir alveg af hverju stór hluti þjóðarinnar flokkar bláar og bleikar pillur í gríð og erg og bryður, sér til gleði og yndisauka.

Friðsamur mótmælandinn ég

2009-01-17T16:33:00.003Z

Ég er friðsamur mótmælandi, en núna næstum bara ælandi. Hef lítið haft mig frammi í mótmælum undanfarna laugardaga en mætti í dag á Austurvöll og stóð stillt og prúð í mínum hógværum mótmælum. Ég lagði ólöglega eins og áður, á sama stað og áður, hálf uppá gangstétt (þar sem engin bílastæði voru laus) og hugsaði með mér að ég þyldi alveg, ef útí það væri farið að greiða sekt fyrir ólöglega lagningu fyrir 2500 kr. í ríkissjóð ef það yrði til þess að við fengjum betra og réttlátra þjóðfélag.

Hvað gerist:

kl:14:45 mætum við og ég legg bílnum ólöglega, og við röltum í bæjinn

kl:14:55 kemur lögreglan og skrifar sekt undir rúðuþurrkuna á bílnum

kl:15:00 byrjar mótmælafundurinn

kl:15:30 hringir lögreglan í Vöku og biður um að bíllinn minn verði sóttur (ályktun mín)

kl:15:45 er Vökudráttarbíll mættur og byrjar að koma bílnum mínum uppá pallinn til sín

kl:15:50 er mér litið í átt að bílnum og hugði að heimferð og sé þá Vökubílinn og lögreglubílinn báða með blikkandi ljós vera að stumra yfir litla rauð

Ég er 10 þús kallinum fátækari vegna valdnýðslu yfirvalda á almennum borgurum sem mæta á mótmælafundi. Undir öllum venjulegum kringumstæðum hefði verið látið nægja að henda miða undir rúðuþurrkuna um venjulega sektargreiðslu. Ég hef heyrt að lögreglan láti hjá líða að fjarlægja bíla sem er ólöglega lagt í marga mánuði og eru öllum til ama. En í þetta skiptið var ákveðið að hrekkja mótmælanda í friðsamlegum mótmælum svona aðeins til að berja niður í honum framhleypnina og óþægðarháttinn!

Ps. ég vil láta þess getið að ég hef 2 áður lagt á nákvæmlega sama stað, og lögreglubílarnir hafa keyrt í umvörpum framhjá án þess svo mikið sem gefa mér vinsamlegt tiltal um að fjarlægja bílinn.

Ég er bálreið. Velti því mikið fyrir mér hvort svona illa sé fyrir okkur komið. Að yfirvöld á Íslandi séu að lýsa yfir stríði gegn okkur almennu borgurum.

Vona að 10 þús kallinn minn verði notaður til að efla löggæslu einhversstaðar annarsstaðar en í kringum bílastæði við friðsamlega mótmælafundi!

Góðar stundir í Helvíti!

kjamsi, kjams...fisk á minn disk...

2009-01-14T16:48:00.004Z

Aumingjans Háaleitishúsfreyjan er búin að vera fisklaus nokkuð lengi. Ég er líklega farin að þjást af D-vítamínskorti og gáfur mínar fara hrakandi, að ég tel. Amma mín sagði mér nefninlega einu sinni að maður yrði svo gáfaður af því að borða fisk, sem skýrir af hverju ég kemst ekki í MENSA. Í morgun var ég svo illa haldin af sjávardýraneysluskorti að ég hringdi í hann Flosa minn fisksala og áður en ég gat lagt tólið á var hann mættur upp að dyrum með þorskblokk. Frábært þjónusta, 600 kall kílóið (ekki af Flosa heldur þorskinum) og nú verður soðinn fiskur með kartöflum og hömsum í matinn. Jammý... Haldiði ekki að Hr. Kópavogur verði sæll og glaður þegar hann kemur heim í kvöld? Já, það er ekki laust við að ég sé með smá roð'a í kinnum ;o)

Ýtum "óvart" á ENTER

2009-01-12T21:20:00.002Z

Nú kallar Andspyrnuhreyfing alþýðunnar á þína krafta.

Mótmælum saman svo eftir verði tekið!

Tekur stutta stund en hefur mikil áhrif svo eftir verður tekið.

Miðvikudaginn 14. janúar kl 14:00 hefjast mótmælin.

Fyllum pósthólf í ráðuneytinu.

1. Sendu tíu tölvupósta á neðangreind tölvupóstföng, valiðhandahófskennt. Tölvupóstur starfsmanna fyllist.

2. Sendu einn póst í einu svo að pósturinn endi ekki í ruslsíu sem fjöldapóstur.

3. Innihald póstsins einföld skilaboð: Heilbrigðisráðherra við mótmælum gerræðislegum vinnubrögðum og niðurskurði í heilbrigðismálum þjóðarinnar.
Lömum símkerfið líka.

4. Hringdu í ráðuneytið: 545-8700 þegar búið er að svara er þér óhætt að leggja á. Símkerfið lamast.

Ef nokkur hundruð eða þúsund manns fást til að taka þátt í svona mótmælum þá þarf ekki að spyrja um áhrif þess við vitum að póstþjónar og skiptiborð munu ekki anna þessari umferð og því mun starfsemi viðkomandi stofnunar lamast tímabundið en ekki skaðast hvorki starfsfólk né tækjabúnaður og það besta er að lögreglan getur bara sinnt sýnu starfi við að halda uppi lögum og reglu úti í borginni og jafnvel einhverjir lögreglumenn tekið þátt í þessum mótmælum.
Láttu ekki þitt eftir liggja!
Nefndin.

Póstföng Heilbrigðisráðuneytis:

Veljið 10 póstföng af handa hófi.

Setjið eftirfarandi texta í subject : Heilbrigðisráðherra við mótmælum gerræðislegum vinnubrögðum og niðurskurði í heilbrigðismálum þjóðarinnar!

Guðlaugur Þór Þórðarson, heilbrigðisráðherra gtt@hbr.stjr.is
Berglind Ásgeirsdóttir, ráðuneytisstjóri postur@hbr.stjr.is
Hanna Katrín Friðriksson, aðstoðarmaður ráðherra hanna.katrin.fridriksson@hbr.stjr.is
Alma Jónsdóttir, stjórnarráðsfulltrúi
alma.jonsdottir@hbr.stjr.is
Arnbjörg Anna Guðmundsdóttir, ritari ráðherra arnbjorg.anna.gudmundsdottir@hbr.stjr.is
Arndís Bragadóttir, skjalavörður
arndis.bragadottir@hbr.stjr.is
Áslaug Einarsdóttir, lögfræðingur
aslaug.einarsdottir@hbr.stjr.is
Ásthildur Knútsdóttir, sérfræðingur
asthildur.knutsdottir@hbr.stjr.is
Bjarni Ben. Arthursson, framkvæmdastjóri Innkaupastofu heilbrigðisstofnana bjarniar@landspitali.is
Björn Kjartansson, bílstjóri ráðherra
bjorn.kjartansson@hbr.stjr.is
Dagný Brynjólfsdóttir, deildarstjóri
dagny.brynjolfsdottir@hbr.stjr.is
Einar Magnússon, skrifstofustjóri
skrifstofa lyfjamála
einar.magnusson@hbr.stjr.is
Einar Jón Ólafsson, hagfræðingur
einar.jon.olafsson@hbr.stjr.is
Friðrik Kristjánsson, umsjónarmaður
fridrik.kristjansson@hbr.stjr.is
Guðmundur Einarsson, sérfræðingur
gudmundur.einarsson@hbr.stjr.is
Guðríður Þorsteinsdóttir, skrifstofustjóri gudridur.thorsteinsdottir@hbr.stjr.is
Guðrún Gunnarsdóttir, stjórnarráðsfulltrúi gudrun.gunnarsdottir@hbr.stjr.is
Guðrún Auður Harðardóttir, verkefnisstjóri UT gudrun.audur@hbr.stjr.is
Guðrún W. Jensdóttir, deildarstjóri
gudrun.w.jensdottir@hbr.stjr.is
Guðrún Sigurjónsdóttir, verkefnisstjóri
gudrun.sigurjonsdottir@hbr.stjr.is
Gunnar Alexander Ólafsson, sérfræðingur
gunnar.alexander.olafsson@hbr.stjr.is
Hallgrímur Guðmundsson, sviðsstjóri
svið stefnumótunar heilbrigðismála
hallgrimur.gudmundsson@hbr.stjr.is
Helga Ágústsdóttir, deildarstjóri
helga.agustsdottir@hbr.stjr.is
Helgi Már Arthursson, upplýsingafulltrúi helgi.mar.arthurssonqhbr.stjr.is
Hermann Bjarnason, deildarstjóri
hermann.bjarnasonqhbr.stjr.is
Héðinn Unnsteinsson, stefnumótunarsérfræðingur hedinn.unnsteinsson@hbr.stjr.is
Hólmfríður Grímsdóttir, lögfræðingur
holmfridur.grimsdottir@hbr.stjr.is
Hrönn Ottósdóttir, sviðsstjóri
svið fjármála og rekstrar
hronn.ottosdottir@hbr.stjr.is
Ingiríður Hanna Þorkelsdóttir, deildarstjóri ingiridur.hanna.thorkelsdottir@hbr.stjr.is
Ingimar Einarsson, skrifstofustjóri (í leyfi)
Ingolf J. Petersen, yfirlyfjafræðingur
ingolf.j.petersen@hbr.stjr.is
Jóhanna Hreinsdóttir, vefstjóri
johanna.hreinsdottir@hbr.stjr.is
Jón Sæmundur Sigurjónsson, skrifstofustjóri skrifstofa almannatrygginga - velferðarmál jon.saemundur.sigurjonsson@hbr.stjr.is
Kristín Ólafsdóttir, skjala- og upplýsingastjóri kristin.olafsdottir@hbr.stjr.is
Kristjana J. Jónsdóttir, móttökustjóri
kristjana.j.jonsdottir@hbr.stjr.is
Leifur Benediktsson, byggingaverkfræðingur leifur.benediktsson@hbr.stjr.is
Margrét Björnsdóttir, skrifstofustjóri
skrifstofa áætlunar- og þróunarmála
margret.bjornsdottir@hbr.stjr.is
Margrét Jóna Jónsdóttir, matráður
margret.jona.jonsdottir@hbr.stjr.is
Margrét Sigurðardóttir, ritari ráðuneytisstjóra margret.sigurdardottir@hbr.stjr.is
Margrét Björk Svavarsdóttir, hagfræðingur margret.svavarsdottir@hbr.stjr.is
Oddný Vestmann, stjórnarráðsfulltrúi
oddny.vestmann@hbr.stjr.is
Ólafur Gunnarsson, viðskiptafræðingur
olafur.gunnarssonqhbr.stjr.is
Pálína Héðinsdóttir, bókasafns- og upplýsingafræðingur palina.hedinsdottir@hbr.stjr.is
Ragnheiður Haraldsdóttir, skrifstofustjóri (í leyfi)
Sigurjón Ingi Haraldsson, skrifstofustjóri skrifstofa þjónustu og rekstrar sigurjon.ingi.haraldsson@hbr.stjr.is
Sólveig Guðmundsdóttir, yfirlögfræðingur solveig.gudmundsdottir@hbr.stjr.is
Steinunn Margrét Lárusdóttir, deildarstjóri steinunn.margret.larusdottir@hbr.stjr.is
Svanhvít Jakobsdóttir, skrifstofustjóri (í leyfi)
Sveinn Björnsson, sérfræðingur
sveinn.bjornsson@hbr.stjr.is
Sveinn Magnússon, yfirlæknir
sveinn.magnusson@hbr.stjr.is
Una Björk Ómarsdóttir, lögfræðingur
una.bjork.omarsdottir@hbr.stjr.is
Valgerður Gunnarsdóttir, sérfræðingur
valgerdur.gunnarsdottir@hbr.stjr.is
Vigdís Hallgrímsdóttir, sérfræðingur
vigdis.hallgrimsdottir@hbr.stjr.is
Vilborg Þ. Hauksdóttir, sviðsstjóri
svið laga og stjórnsýslu
vilborg.hauksdottir@hbr.stjr.is
Þórdís Stephensen, stjórnarráðsfulltrúi
thordis.stephensen@hbr.stjr.is

Ökuníðingur og svíðingurinn ég!

2009-01-05T21:26:00.007Z

Einu sinni var ég stoppuð af lögreglu vegna of hægs aksturs í útlöndum, og það ævintýri endaði með því að ég fékk "lögreglufylgd" í stærstu verslunarmiðstöð í Danmörku.

En nú er það staðfest og skjalfest að ég er ökuníðingur og svíðingur. 36 ára og 232 daga gömul fékk ég mína fyrstu hraðasekt! Mér er brugðið, mannorð mitt í molum og ég er ekki frá því að ég þurfi að leita mér áfallahjálpar.

Ljósmyndari ríkisins var búin að setja sig í stellingar og náði að festa á filmu glanna-akstur minn í Hvalfjarðargöngunum á leið minni Hr. Kópavogs um daginn.

Mig grunar í aðra röndina að þessi myndataka hafi nú ekki verið eingöngu vegna aksturslagsins heldur hafi þessum grámyglustaursljósmyndara þótt ég svo afskaplega hugguleg, og jafnvel bara nokkuð æsandi þar sem ég keyrði þokkafullt niður brekkuna, skælbrosandi af hamingju í draumaheimi um það sem biði mín "heima". Til að staðfesta þá kenningu mína að ríkislögreglustjóri hafi eingöngu vantað mynd af mér á skrifborðið sitt, þá leit ég á sektarskemað hjá embættinu og komst að þeirri niðurstöðu að ég hafði verið sssvvvooooo "nánast" lögleg að það hálfa væri alveg nóg. Sektin hljóðaði uppá kr. 3750,- og ríkisljósmyndarinn hafði náð að "blossa" (kynæsandi orð?!) mig á 76-80 km hraða þar sem hámark er 70! Þetta finnst mér voðalegur tittlingaskítur, en mikið var ég óneitanlega fegin því að þurfa ekki að borga meira með myndinni á skrifborðið.

Legg ekki meira á ykkur af dónalegu hjali í bili.

Over and out.

Harðar-barna-syndrom?

2009-01-03T20:43:00.003Z

Í mikilli geðshræringu yfir ákveðinni staðreynd velti ég fyrir mér hvort til sé eitthvert sjúkdómseinkenni sem heiti "Harðar-barna-syndrom"? Málið er að facebookið mitt hefur frosið einstöku sinnum og í einhverri óþolinmæði varð mér á að ýta of oft á einhverja takka (hamast á lyklaborðinu mínu eins og snaróð miðaldra kona í austurbænum) og afleiðingarnar urðu þær að ég sendi einhverjum aumingjans íslensk-ættuðum-ásatrúar-hellsangels Finna vinarbeiðni. Allavega þótti mér hann ekki árennilegur þegar hann sendi mér póst og bað mig nú að rifja upp hvaða fjörur við hefðum sopið saman, því hann kannaðist ekkert við að hafa átt eitthvað við mig að sælda. Ég er enn að úthugsa hverju ég á að svara honum.

Var að velta því fyrir mér hvort það sé einhver bölvun yfir tölvunotkun "Harðar-barna". Fyrst var það Bjarni og svo var það ég..... og við erum ekki einu sinni skyld.

Þetta er óhuggulega óútskýranleg ráðgáta.

Gleðilegt nýtt ár

2009-01-01T12:24:00.002Z

Eftir dásamlegt jólafrí, sem einkenndist, af góðum mat, frábærum félagsskap vina og ættingja, hóstajarmi, hauskverk og kvefpestum er ég komin í Kópavoginn. Gamárskvöldið einstaklega ánægjulegt með Hr. Kópavogi og hans slekti, og svo ekki sé minnst á að ég virðist vera einstaklega heppin í spilum og náði að niðurlægja heimilismenn hérna trekk ofan í æ. Veit ekki alveg hvort ég eigi að taka því þannig að ég sé óheppin í ástum í staðinn. Það mun tíminn væntanlega leiða í ljós. Þið lesið bara um það á Facebook! Addi minn sá í morgun að ég er "í sambandi" við hann á Facebook. Hann las það víst þar. Þegar við sátum með kaffið við eldhúsborðið horfði hann í augu mér og spurði.
Addi: " Ertu nokkuð ólétt?"
Ég: " Hef ekki græna glóru, en þú munt örugglega lesa það á Facebook ef ég vissi það".
Addi: " Já, ég vona að ég verði fyrstu til að kommenta!" á breytta stöðu " Kolbrún með barni!"
Ég (kyssti hann á nefbroddinn) :"Ég lofa þér því."

En það sem hann veit ekki, er að á Facebook er ekki hægt að breyta stöðu "með barni" og "ekki með barni". Tíhí... gott á hann.

Gleðilegt nýtt ár dýrin mín stór og smá, og svona til að valda engum misskilningi þá er ég ekki ólétt nema af þessum standard aukak.... sem hafa miklu lengri meðgöngutíma en 9 mánuði.

2008-12-24T15:39:00.007Z

GLEÐILEG JÓL

FARSÆLT KOMANDI ÁR

FULLT AF ÁST OG FRIÐI

óskum ég og Dofri,

ykkur og okkur til handa

2008-12-23T19:15:00.002Z

Þorláksmessukvöld, og ég búin að eiga yndislegan dag, hitta fólkið mitt, drekka kaffi, skreyta, fara á rúntinn með mömmu og útrétta það síðasta. Eins og alltaf er ekkert jólastress í foreldrahúsum. Pabbi og mamma hafa aldrei farið yfir um af jólastressi og aðdragandi jólanna er afskaplega notalegur og afslappandi.
Ég og Dofri minn brunuðum norður á sunnudaginn og náðum að vera á undan hlákunni. Tróð ég rúmlega einni gjafa-búslóð í litlu elöntru og pabbi og mamma skildu engan veginn hvernig mér tókst að koma öllum varningnum sem ég mætti með inná gang, í gamla rauð. Ég held að bíllinn minn sé eins og Mary Poppins-taskan. Það er endalaust pláss.
Við erum eins og blóm í eggi hérna fyrir norðan og lífið er dásamlegt. Sendi mínar bestu kveðjur suður heiðar og Hr. Kópavogur, þú ert alveg ljómandi ;o)

Jóla hvað??..... Drukknaði í teskeið!

2008-12-19T20:22:00.002Z

Þá er frúin á Háaleitinu komin í jólafrí! Lífið er dáldið tætt þessa dagana, en þó hefur tætingurinn skilað sér í fullum kassa af jólagjöfum sem þurfa að leita eigenda sinna, eldrauðu jólahári sem Pink væri stolt af og 3 gömlum skópörum sem gengu í endurnýjun lífdaga við heimsóknina til skósmiðsins.

Skóarinn hefur í mögu að sýsla, og skilst mér að jafnvel heldri frúnnar í hverfinu komi með skóna sína til upplappingar í staðinn fyrir að kaupa sér nýja. Mér finnst gaman að heimsækja skóarann. Hann er eldri karl, sem er ekkert að stússast með eitthvað númeramiðasystem, heldur merkir skóna "Kolbrún". Svo kem ég og sæki og bendi bara á skóna sem ég ætla að sækja, því hann hefur ekki hugmynd um hvaða skó ég kom með. Valdi ég mér úrvals fallega skó úr hillunum hjá honum. Hann er alltaf glaður og ég velti því smá fyrir mér hvort það sé vegna límlyktarinnar sem svífur á mann í dyrunum.

Ég veit ekki alveg hvað er að gerast, en ég er dottinn í vísa kortið og það er glóandi heitt af ofnotkun þessa dagana. Mig langar ótrúlega til að kaupa mér bíl, 4x4 bíl. Mér finndist það nú viðeigndi jólagjöf handa mér frá mér. En kannski óraunhæf, veit ekki alveg.....

heima er best

2008-12-16T07:53:00.002Z

Síðasta vinnuvikan byrjuð og jólafríið mitt nálgast. Mér finnst aðventan svo yndislegur tími, en neita því ekki að annir desember þetta árið hafa verið meiri en oft áður. Kannski af því að ég byrjaði of seint. Núna er ég búin að fatta hvað er guðsblessunarþakkarvert að vera búin að versla jólagjafir áður en desember byrjar. Eins og ég er nú skemmtileg innanum annað fólk, þá fúnkera ég mjög illa í mannmörgum verslunum. Í desember sneiði ég hjá öllum verslunarmiðstöðvum ef ég mögulega get og held mig heima við, með kaffi, kerti og kökur. Læt umheimin alveg lönd og leið.... heima er best!

Hamingjupirringur?!

2008-12-12T10:56:00.002Z

Hamingjan svo yfirþyrmandi að ég hef ekkert til að pirra mig yfir þessa dagana nema jólafrímerkjunum. Hverslags ljótuveiki kom yfir hönnunar-stílista frímerkjadeildar Póstsins? Held þetta séu þau al ljótustu merki sem ég hef klínt á kortin mín í áravís. Nú skil ég af hverju boðið er uppá sjálf-hönnunardæmi á netinu og fólk geti skipt út leggjalanga og búkbreiða sveinka fyrir brosandi mynd af fallegu fjölskyldunni. Ég neitaði að kaupa jólasveinamerki og bað um eitthvað annað og fékk skárra. En ljóti jólakötturinn fór víst á bréfin til útlanda og hér með bið ég viðtakendur velvirðingar á þessu ósmekkleysi, en þorskurinn og virkjanirnar voru í sama flokki og kattarófétið. Í ljótudeildinni!

Já lífið er gott, og jólin að koma. Gott að jólamerkin eru pirringur desembermánaðar ;o)

Góðar stundir!

Sker'í laufabrauðskökur?

2008-12-08T21:56:00.003Z

Þær voru ekkert voðalega skerí laufabrauðskökurnar sem við skárum í eftir vinnu í dag, en afskaplega girnilegar. Reyndar voru kökurnar hans Þorsteins Péturs smá meira skerí en fallegu handunnu kökurnar hennar Önnu Guðnýjar, en allar höfðu þær sinn sjarma, hvort sem þær væru grófgerðar eða fínna unnar. Anna Guðný, Dofri, Þorsteinn og Ninna mín voru eitilhörð í útskurðinum. Til umræðu kom að gera eina köku með upphafsstöfunum DO fyrir Davíð Oddsson, en eftir smá umhugsum fannst okkur hann ekki eiga hana skilið. En annað finnst mér þó verra. Í ár gleymdi ég að gera eina köku fyrir Jesús, en það hefur ekki gerst í mörg ár. Fyrirgefðu Jesús, ég skal gera tvær kökur fyrir þig að ári. Mun ekki klikka aftur!

ég er ekki alveg samviskulaus...

2008-12-07T12:06:00.002Z

Nú verður sumum hlutum ekki slegið lengur á frest. Mig er farið að langa til að jólaskreyta, en fæ mig ekki til að skreyta yfir þumlungarlag af ryki og skít! Ef við hefðum verið að tala um svona cm dæmi, þá hefði ég ekki áhyggjur af því. Þannig að nú uppúr hádegi mun náttfatasófapartýinu slúttað og ég ætla að reka skít og drullu út úr mínum húsum með mr.Proper sem aðalvopn! Vona að hann nýtist vel í þetta verkefni, stæltur, sterkur, ákveðinn, blíður og jafnvel dáldið ástleitinn.....#$#%#$% hlakka ég til að sjá hann vinna ;o)

knúsavöruskipti kosta engan pening!

2008-12-04T22:54:00.004Z

Ég fór í búð í dag og sagði við afgreiðslumanninn " Mig vantar eitt stk. jólaknús! Áttu ekki svoleiðis?" Hann átti svoleiðis, og ég fékk svoleiðis, þurfti meira að segja ekkert að borga fyrir nema með knúsi til baka. Svona vöruskipti virka vel í kreppnunni.

Ég er berdreymin!

2008-12-01T21:42:00.003Z

Varð fyrir mjög óvæntri reynslu fyrr í kvöld þar sem ég upplifði drauminn sem mig dreymdi í síðustu viku. Ég fór á jólatónleika í Fíladelfíu og hver skildi hafa dúkkað upp þar nema hann Jónsi minn í svörtu fötunum! Hann blikkaði mig og laumaði til mín miða með símanúmerinu sínu, rétt áður en hann skrönglaðist á sviðið og tók eitt jólanúmer með Edgari Smára. Þarna rættist kaffihúsadraumurinn. Dúddahljómsveitin var öll mætt í bakgrunni og spilaði að hjartans list og gott ef Kata systir var ekki þarna í bakröddum (gospelkórnum) eða allavega eitthvað tvíburaklón sem átti annað klón annað staðar á sviðinu. Er þetta flókið? Tónleikarni frábærir og ég skemmti mér konunglega og gott ef ég er ekki búin að næla mér í miða á jólatónleika með henni Carola Haggkvist þann 17.des. Vonandi kemur hún með vindvélina með sér til Íslands.

Draumráðningar óskast...

2008-11-27T21:58:00.003Z

Jónsi í Svörtum fötum hringdi í mig og bauð mér á kaffihús. Honum leiddist! Ég þáði boðið og hitti hann á svölu kaffihúsi í miðbænum. "Hvar er Rósa" spyr ég, og hann segir að hún sé að hitta vinkonur sínar. Við fáum okkur kaffi og ég segi "Hvað er að frétta af Þórði bróður þínum?, er hann ekki alltaf fyrir austan?" "Jú,..jú... hann hefur það fínt" segir Jónsi. Hann fer svo eitthvað á bakvið því hann var kallaður í símann (svona snúrusíma) og þá sé ég Kötu systir í karókí röðinni, ásamt haug af 10 ára gömlum gelgjum. Þetta var glænýtt karókí-kerfi, alveg ógeðslega flott og allir vildu prófa. Ég spyr Kötu hvort hún ætli virkilega að prófa. Ójá, hún var dauðæst í það. Jónsi kemur aftur og hjá okkur setjast einhverjir dúddar og kaffið er klárað. Ég þakka fyrir mig og vakna, því alltí einu er komin morgun og ég þarf að fara í sturtu.

Þetta var einstaklega djúpur og merkingarlegur draumur. Nú langar mig í draumráðningar! Hver ræður í þessa speki?

Borgara-fundur!

2008-11-24T20:07:00.002Z

Á meðan ég sit á sófanum er haldin fundur borgara / greiðenda í Háskólabíói. Það er stútfullt bíó af skuldurum Íslands sem hafa nákvæmlega ekkert til skuldarinnar unnið og nú bregður bleik, því mér sýnist að Geir Haarde og Ingibjörg séu mætt til að horfast í augu við borgarana. Þorvaldur Gylfason fer á kostum og ég hef það á tilfinningunni að þetta verði fjörugur fundur.
Ég er ekki komin í "doðann" og er dáldið mikið "reið" ennþá!

2008-11-22T22:27:00.003Z

Berrassaði maðurinn bankaði uppá og mátaði nærbuxurnar. Þær voru ekki passandi og því voru góð ráð dýr. Eftir mikið bax og bis var notuð öskubuskuaðferðin og öxin sótt. Nú er hann glansandi fínn í leppunum úr Bónuspokanum og sendi ég hann út á lífið glaðann og reifann. Ég er líka glöð að Bónusfatapokinn er ekki lengur að þvælast fyrir heima hjá mér og vona að "gaurinn" minn jafni sig á áfallinu sem hann fékk við að finna ókunnar karlmannsbrækur á sínu yfirráðasvæði. Þetta er ekki auðvelt þetta líf.

Karlmannsbrækur í óskilum

2008-11-20T19:37:00.002Z

Áður hef ég bloggað um karlmannsplögg sem skilin eru hér eftir í algjöru reiðileysi og ég reikna fastlega með að Andreas sé enn sokkalaus, því parið hans bíður spennt eftir honum í forstofunni síðan hann skildi það eftir um daginn á leið sinni til Svíþjóðar. En nú bregður svo við að í gærkvöldi fann ég Bónuspoka, sem í voru nærbuxur, bolur og sokkar. Karlmannsnærbuxur, karlmannsbolur og karlmannssokkar! "ÓHREINAR" nærbuxur, bolur og sokkar! Svo óheppilega vildi til að "gaurinn minn", áður nefndur c)liðurinn þverneitaði fyrir að hafa dúkkað hér upp með nærföt í Bónuspoka og krafðist skýringa á ástandinu. Hum....mér varð orða vant og auglýsi hér með eftir eiganda Bónuspokans, og mun héðan í frá reyna að hafa betri stjórn á því hverjir hátta sig á mínu heimili!

Kreppubusiness...

2008-11-17T21:16:00.003Z

Nú er hart í ári og Baunin farin að bjóða upp eigur sínar gegn vöruskiptum.

http://betabaun.blogspot.com/

Ég ætla mér að krækja í brúnu könnuna og býð á móti forlátan písk, sem er á lengd við gæðafarsíma frá árinu 2002, og páskaskraut til að hengja á jólatré!

Hvernig lýst þér að það Baun?

Ef að Bauninni hugnast ekki þessir hlutir, er öðrum velkomið að bjóða í með ámóta gagnslausum hlutum.

..meira í dag en í gær..

2008-11-17T12:39:00.002Z

Í dag skulda ég 2 milljónum meira en í gær, eða jafnvel 4 milljónum meira, þar sem Dofri minn er ekki fjárráða og allar hans skuldbindingar eru mínar.

4 milljónir vegna þess að Björgúlfsfeðgar fóru að leika sér í útlöndum!

Fussum svei.... ég er enn bálreið... er súr yfir því að hafa látið ESB vaða yfir okkur í valdi stærðar sinnar og kúga okkur til hlýðni. Ég skil ekki hvernig fólki dettur í hug að sækja um aðild að slíkum samtökum. Akkurat núna er ég MJÖG á móti því að við göngum í Evrópusambandið. Sé ekki að við munum græða nokkuð á því nema valdníðslu og yfirgang.

2008-11-14T18:23:00.002Z

Djúsí færsla fyrir Dýrleifu og Pálínu.
Rauðvín komið í glas og kossar og kelerí í eldhúsinu halda mér frá blogginu. Gaurnum finnst þó mér beri skilda til að uppdeita þreyttar vinkonur mínar á "ástandinu", rasskellir mig og sendir mig öfuga inní stofu (líklega til að eiga eldhúsið einn). Nú á að kynna Frú Kolbrúnu fyrir einhverjum fjölskyldumeðlimum ættaða úr Kópavoginum. Það er örugglega þess vegna sem ég ákvað að fá mér rauðvín í fyrra fallinu! Þetta verður áhugavert kvöld!!

Góðar skuldir.... nei.. meina stundir!

2008-11-11T21:29:00.004Z

Nú er einum færri skítbuxanum í þinghúsinu okkar (sem betur fer) og það besta var að hann féll á eigin bragði. Væri óskandi að fleiri tækju sér hann til fyrirmyndar og létu sig hverfa. Það er einhver fnykur og ólykt í alþingishúsinu okkar og þyrfti að lofta duglega út og gera góða "jóla"hreingerningu. En ég veit svo sem ekki hvort það bæti nokkuð að lofta út, þar sem ólyktin er líka utandyra. Mér líður eins og einhver sé að bera mykju á túnin sín hérna umhverfis húsið mitt, nema ef vera skildi að "auðvaldshyggjupúkarnir" séu enn að velta sér uppúr siðspillingardrullunni þrátt fyrir allt sem á undan er gengið.
Er einhver furða þó maður efist um að þessir menn eigi nokkuð eftir að læra af efnahagshruni okkar Íslendinga, sem þeir bera alfarið og eingöngu ábyrgð á?!

2008-11-08T22:01:00.001Z

Þrátt fyrir almenn leiðindi á markaði og í efnahag, þá hefur lífið sjaldan verið eins ánægjulegt og nú um stundir. Er farin að vita fyrir vissu að allir snjóskaflar bráðna, él birtir upp um síðir og sumar kemur í sálina eins og árstíðaskipti eru á heimskringlunni. Nú er einmitt sumar eftir nokkuð þungan vetur snemma í haust í minni sál.

c)liðurinn í færslu 25.október virðist vera enn á lífi. Er búið að sjúkdómsgreina hann og er hann með ólæknandi ástarkollu-krabbamein sem breiðst hefur út um líkamann, og ég, sýkillinn mun gera mitt besta til að engin lækning finnist við þessari tegund krabbameins. Ég tel að um góðkynja æxli sé að ræða. Gott ef hann er ekki bara "keeper", en það mun tíminn leiða í ljós. Mér þykir allavega alveg óskaplega gaman og notalegt að vera í návist hýsilsins og hann fær mig til að hlæja og akkurat núna ætla ég bara að njóta þess að líða vel. Vona bara að meinið leggist ekki svo þungt á hann að ég murki úr honum líftóruna.

Í tilefni alls þessa þykir mér viðeigandi að horfa á einn klassiker, sem "yfirdrátturinn" á Laugarásvídeó var svo almenninlegur að grafa upp fyrir mig. Ætla á sófann og horfa á Kryddlegin hjörtu, þá dásamlegu ræmu á spólu, já þær eru víst enn til.
Góðar stundir!

hlýtt...og gott??

2008-11-05T17:25:00.004Z

Nú eru óvenjuleg hlýjindi í nóvember. Í dag er 8 stiga hiti. Ætli ástæðan sé sú að farið sé að kynda meira í hinu neðra, í undirbúningi fyrir væntanlega stórveislu peningamongúlanna sem eru búnir að leika okkur grátt. Ég reikna fastlega með að þeirra bíði móttökunefnd þar!

Nú er ég loksins orðin alveg voðalega reið...

2008-11-03T18:55:00.004Z

...blá í framan af reiði, hneigslun og skömm er ég yfir því hvernig íslenskir fermingadrengir sem mættu í bankann sinn á milli flugferða í einkaþotum hafa hagað sér. Svo eru bara allar skuldir við þessa höfðingja afskrifaðar eins og ekkert annað væri sjálfsagðara fyrir hvað??....50 millJARÐA! Engar skuldir eru afskrifaðar hjá okkur fólkinu í blokkunum, í passlega stóru húsunum okkar sem við munum borga af það sem eftir er ævinnar, eða þær skuldir sem fólk stofnaði til að áeggjan ríkisstjórnarinnar og bankanna í hlutabréfakaup (sem betur fer fór það allt framhjá mér)... ég gæti þusað og þrasað hérna langan og leiðinlegan söng, en læt hér staðar numið. Mér þykir óskaplega sorglegt þegar siðleysið er algjört!

En þessi söngur þykir mér dáldið cool....og miklu flottari en bölmóður minn.

http://www.youtube.com/watch?v=e8Yv0NluonQ&feature=related

Brjósta-Þrif!

2008-11-01T13:22:00.004Z

Dr. Phil malar í bakgrunni og ég heyri útundan mér að aaammerísk frú segir að hún sé svo brjóstastór að hún geti ekki þrifið í kringum sig. *Dæs* best að drífa sig í hreingerningar, ég hef víst engar afsakanir.....

Loksins barði kreppan mig all-illilega

2008-10-27T17:25:00.003Z

Hvað geri ég á morgun þegar ég vakna og ætla að fá mér morgunmat og ekkert Cheerios til?!

Kreppan náði í rassinn á mér endanlega....nú ert ástandið orðið raunverulegt. Ekkert Cheerios var til í Bónus í dag. Hillurnar galtómar. Mér líður illa....

Laugardagsmorgun...

2008-10-25T11:43:00.005Z

Er að gaufast hérna á náttfötunum með kaffibollann sem minn sálufélaga og klukkan orðin nálægt hádegi. Búin að fara yfir verkefni frá nemönd og planið er að fara út í góðan göngutúr. Veit eiginlega ekki hvað ég á að skrifa um. Á ég að skrifa um...

a) drulluna sem er að koma í ljós þegar fjarar undan útrásarvíkingunum? Líkist eiginlega hálfgerðu kviksyndi og mér sýnist að við öll séum að sogast ofan í drullupyttinn (sem stækkar og stækkar) með hornin á höfðinu...eða var það túrban....anyway það er eitthvað hryðjuverkalegt?

b) gleðifrétt um hvað er frábært að vera á dragnótarbát og hvað handtökin voru fumlaus og æfð þegar fiskur var dreginn um borð (feel good frétt á mbl.is, svona fyrir utan sjóveikina)?

c) manninn sem bauð mér á deit í vikunni og sagðist hugsa um mig í vöku og svefni, að ég væri í huga hans og hjarta, eiginlega eins og krabbamein, alveg útum allt?

d) að hárið á Söru Palin verðir aðalsigurvegarinn í forsetakosningum vestanhafs....(voðalega hafa ameríkanar slæman hár-smekk og fréttin er fáránleg, eða ameríkanar, eða bæði)?

Ég er voða mikið í vafa....

Topp tíu listi karlmannsins

2008-10-20T16:59:00.003Z

Sjálfboðaliðinn sendi mér Topp 10 listann sinn yfir bjánakonur sem hann hefur deitað og danglast með. Ég held hann sé verri en minn, svei mér þá, eða allavega ekki betri. Konur eru líklega líka bjánar.
Verði ykkur að góðu!

10. Konan, sem ætlaði að gera afmælisdaginn minn ógleymanlegan á mjög persónulegan hátt, gerði það....með því að fara í fílu út af fyrrverandi manni sínum og kvöldið varð ónýtt!

9. Konan ætlaði að eiga rómantískasta kvöld ever, hljóp út frá því, þar hún fékk samviskubit yfir því að líða svo vel hjá mér!

8. Konan kom sérstaklega í bæinn að norðan til að hitta mig og hringdi og sagðist vera á leiðinni en gleymdi greinilega að beygja á réttum stað því hún endaði fyrir norðan í lokin án þess að koma í heimsókn!

7. Konan bauð mér að vera hjá sér yfir nótt en sparkaði mér úr rúminu kl. tvö um nóttina og sagðist þurfa að fara að sofa og vildi sofa í friði!

6. Konan lýsti sér sem þvílíkri dís en þegar hún opnaði hurðina þá var Gilitrutt fegurðardrotting aldarinnar í samanburði við hana!

5. Konan bauð mér í sturtu með sér en sturtuklefinn var svo lítill að hún komst bara fyrir og ég beið fyrir utan kaldur og rómantíkin fór svooooooooooniður fyrir frostmark!

4. Konan var búin að hugsa svo mikið um draumastefnumótið sitt sem hún margröflaði um, að hún hafði gleymt að fara í bað eftir að “Rósa frænka” var í heimsókn!

3. Konan lýsti því yfir að hún væri meistarakokkur en samt tókst henni að brenna einfaldan mat og afsakaði sig með því að vera ekki í stuði til að elda!

2. Konan var búinn að tala mikið um að hittast á góðum veitingastað og eiga rómó stund saman en fatasmekkur hennar var svo lélegur að ég fílaði mig eins og að sitja með róna sem var í stigapoka skóflandi í sig matnum eins og jarðýta………maður missti hratt matarlystina við þetta!

1. Konan, bauð mér heim í rómó kaffi og "eitthvað með því" en var svo að strauja á fullu á meðan sem var algjör rómó killer og turnoff fyrir mittítalska blóð!

Ha...ha..ha...ha... gott að ég er ekki ein um að vera í lúðadeildinni. Takk fyrir þetta "lúðadeildarspilari".

2008-10-16T20:42:00.007Z

Loksins þegar iðnaður blómstrar á Íslandi og gæti hugsanlega verið okkar einasta ljós í efnahagsmyrkrinu ræðst lögreglan til athlögu og upprætir björtustu von í útflutningi landsins! Þessi verksmiðja hefði líklega getað bjargað þjóðarbúinu og skapað miklar gjaldeyristekjur. Ég varð hálf skúffuð þegar ég vissi um hvað blaðamannafundurinn fjallaði. Ég hafði gert mér í hugarlund að það væri dáldið af blóði, líkum og geðsjúklingum sem gengju lausir. Langaði í krassandi sögu, en líklega verð ég bara að fara í Mál og Menningu til að ná mér í alvöru glæp.

Hér hefur karlmaður látið í sér heyra í kommentakerfinu og vill gjarnan deila Topp 10 lista sínum yfir bjána-konur sem hann hefur hitt í gegnum lífið og ég hef tekið að mér að birta þennan lista, þegar mér hefur borist hann í hendur. Mér leikur forvitni á að vita hvort minn og hans listi séu eitthvað líkir. Vona að hann standi við gefin loforð um að senda mér Toppinn, en annars verður hann komin á bjánalistann minn.

Svona til að rétta aðeins úr eldamennskukútnum, þá eldaði ég dýryndis fisk í kvölmatinn. Birti hér myndir af fallega fiskréttinum mínum og ljóta kúknum á pönnunni. Þetta er alltaf bara í ökla eða eyra.

2008-10-13T18:06:00.004Z

Orðlaus, þreytt en byrjuð að föndra aftur ;o)
Heimilisiðnaðurinn blómastrar sem aldrei fyrr. Ætli allir fái ekki heimatilbúnar jólagjafir í ár?!... og gúllasið að brenna á pönnunni. Og Dofrinn minn er kominn heim....jibbbýýýý...

......HLÉ....

..... og nú er búið að borða, reyndar var lítið borðað, því ég er ótrúlega lunkin í því að fara að gera eitthvað annað en elda mat þegar ég elda mat. Á borð voru borin flamberuð hrísgrjón með góðri brunalykt, glerhörð smábrauð töluvert dökk á lit, og Tikka Masala gúllas sem leit út eins og kúkur á pönnu! Verði ykkur að góðu....

Ræsisrotturnar munu halda veislu í kvöld og ég og Dofri munum eftir ca klukkutíma laumast í eldhúsið aftur í leit að einhverju ætu. Á morgun ætla ég að elda lærisneiðar og vanda mig óskaplega mikið!

2008-10-11T19:09:00.003Z

Í ljósi nýliðinna atburða og þess að ég horfði á dönsku bíómyndina Nynne í gærkvöldi um single-konuna í deitbransanum, ákvað ég að búa mér til lista. Ekki lista fyrir menn sem ég hata vegna einhvers eins og danska stelpan heldur lista yfir mestu bjána sem ég hef hitt um ævina.

Topp tíu yfir mestu bjána sem Kolbrún hefur fyrirhitt á lífsleiðinni. Tek það fram að sumir mennirnir eru á fleiri en einum stað í þessum lista, enda voru þeir erki-aular.

10. maðurinn sem bauð mér í mat og átti ekkert til að elda!

9. maðurinn sem vildi klæða mig upp eins og 60 ára kennslukonu!

8. maðurinn sem bauð mér til sín en ætlaði svo ekkert að vera heima!

7. maðurinn sem beið við dyr hverrar konu sem hann kynntist með tannburstann í bónuspoka!

6. maðurinn sem bauð uppá rómantík dauðans en vildi engin tengls!

5. maðurinn sem röflaði yfir mér mörg kvöld en hafði engann áhuga. Honum hlýtur að hafa leiðst heima hjá sér!

4. maðurinn sem bauð mér út að borða og hélt ég væri í vöruskiptum, kynlíf-matur!

3. maðurinn sem gat ekki verið í baði með mér, því hann hafði áhyggjur af rakaskemmdum í gólfi ef vatnið flæddi útfyrir!

2. maðurinn sem bauð mér á árshátíð og hringdi 5 mín fyrir og sagðist vera hættur við að bjóða mér og ætla einn!

1.maðurinn sem sagði að hann væri skotinn í annari konu, en vildi samt hitta mig áfram!

*Dæs* ég segi bara "áhyggjur af efnahagsástandi heimsins?? my ass, ég hef miklu meiri áhyggjur af því að karlpeningur landsins sé orðin að dreggjum þjóðfélagsins.

2008-10-11T13:16:00.003Z

Skokkaði lítinn hring í hverfinu mínu í morgunsárið og sá ekki betur að Ísland væri við hestaheilsu svona líffræðilega. Lífið og tilveran brosti á móti mér, sól og blíða, Esjan falleg og Laugardalurinn í sínu fallegasta pússi. Hann skreyttu svo eldra fólk á morgungöngunni og einstaka unglamb á hlaupum.

Blótaði mér í sand og ösku yfir því að rekast alltaf á myndarlega lögreglumanninn á eftir hæðinni þegar ég er nývöknuð með Jonny Rotten hárgreiðsluna eða á kartöflusekkjanáttfötunum úr RL í þvottahúsinu. Hvernig væri nú að ég reyndi að vera hugguleg til fara svona einu sinni þegar ég rekst á þetta barn?! Set það á To do listann minn ;o)

Í gærkvöldi var svona sjálfsknúsarkvöld hjá mér. Kveikti á kertum, fór í náttföt og skenkti mér hvítvíni í eitt glas, dempaði ljósin og sleit svo loftnetssnúruna í sundur í einhverju brasi og endaði með verkfærakassann á gólfinu, töng í einni hendi og dúkahníf í hinni. Sjálfselskan og rómantíkin sem hafði skapast við kertalýsinguna rauk útí verður og vind og nú snjóar í sjónvarpslandi, frekar meira en áður. Fattaði ekki banka uppá hjá löggunni og leika bjargarlausa konu. Stupid woman!!!!

2008-10-09T17:04:00.004Z

Þessi færsla er sérpöntuð fyrir fallhlífastökkvarastelpuna nöfnu mína í Ameríku sem bíður með gestakojurnar ready þegar íslenskir vinir og ættingjar flýja sökkvandi sker.

Geir er farinn að opna sig og heldur blaðamannafundi á hverjum degi þar sem skýrt er frá óskýrri stöðu mála á bankamarkaði. Mér þykir betra að hann tali. Þetta á svosem við um flesta karlmenn, þeim finnst ekki gaman að tala um óþægilega hluti. Ætli Geir sé á mála hjá sama sála og ég? Hann er farin að láta allt flakka eins og ummæli hans um Bretana í dag sanna.

Davíð og Árni Matthíííí sen eru alltí einu orðnir þeir sem komu Kaupþingi á hausinn, því þeir hafa líklega óverdós af estrageni og töluðu of mikið og of vitlaust!

Sem betur fer hafa fermingardrengirnir (eða óreiðumennnirnir eins og amma hans Davíðs kallaði þá, og pabbi kallaði óreiðupésa) látið lítið fyrir sér fara og hafa annaðhvort fengið sér búrkur eða ganga um með hauspoka svo þeir séu illþekkjanlegir. Sögusagnir segja að sumir þeirra séu flúnir land. En það eru sögusagnir. Kolla mín, vertu bara á varðbergi, ef einhver ókunnugur með kaldar tær reynir að skríða uppí til þín.

Kona hefur loksins verið skipuð bankastjóri yfir nýjum Landsbanka hf, og þykir mér það batamerki á íslensku hagkerfi. Þó konum þyki yfirleitt gaman að versla þá held ég þær komist ekki með tærnar þar sem óreiðupésarnir höfðu hælana í innkaupaferðum sínum til útlanda. Konur eru varfærnar í svo mörgum málum og ég er ekki frá því, að áhyggjuskýjunum hafi eitthvað létt í augum sumra við að frétta það.

.. .en við spyrjum að leikslokum. Mér finnst mjög óeðlilegt ef við fáum ekki að gríta tómötum og eggjum í pésa dressaða Bossjakkafötum á Lækjartorgi þegar öll kurl verða komin til grafar. Ég vil láta draga þessa menn til ábyrgðar.

Er þetta ekki nokkuð góð lýsing á ástandinu í dag?

2008-10-07T22:03:00.009Z

Þessi frétt vakti athygli mína innan um hörmungarfréttirnar á mbl.is í kvöld.

http://www.mbl.is/mm/frettir/taekni/2008/10/07/bifreid_sem_er_serhonnud_fyrir_konur/

Bíll sérhannaður fyrir konur, sjálfskiptur og með rat-tæki og sjálfvirkum hreinsunarbúnaði þegar maður þarf að skipta um dekk þegar punkterar.

.....þegar landið mitt sekkur og sogast endanlega niður í svartholið flyt ég til Íran með alla peningana mína *hóst*, kaupi mér svona "skvísubíl" og búrku. Ég er viss um að ég er ómótstæðilega hugguleg í búrku.

Fann þessa mynd og er viss um að við systur yrðum "NÁKVÆMLEGA" svona sexý í þessum frábæra klæðnaði.

Stórasta gæjugat í.....

2008-10-05T13:00:00.003Z

Það er heldur tíðindalítið á leitinu þessa dagana. Reyndar læsti ég unglinginn úti (Hörð frænda) í nótt og þurfti að beita áhöldum eins og hnífum og töngum til að koma honum inn um dyrnar og uppí rúm í morgunsárið. Snerillinn á hurðinni gaf upp öndina undir miðnættið líklega, og því brá ég á það ráð og taka hann af, áður en ég fór út í morgun svo mér yrði ekki úthýst. Afleiðingarnar urðu stórasta gæjugat í heimi líklega og virkar það frá báðum endum. Dáldið flott, finnst ykkur ekki?
Þetta gat er á stærð við fjármagnsþurrðarsvartholið í heiminum...sem ríkisstjórnirnar sitja sveittir yfir og reyna að stoppa í.

2008-10-02T18:32:00.002Z

Um síðustu helgi var "skvísu"helgi, en nú bendir ekkert til annars en það verði "krísu"helgi. Já, stundum er lífið svona ökla/eyra dæmi. Núna er semsagt öklinn inn. Reyndar frekar snúinn heyrist mér í öllum fjölmiðlum. Þetta er víst hið mesta ófremdarástand og held ég að það sé ágætt að vera eins og ég, eiga nánast ekkert og skulda ekkert nema húsið mitt, sem fyllir engar myntkörfur. Aldrei þessu vant er gott að eiga staðgreiðslu IKEA land á Háaleitinu en EKKI innlit-útlit íbúð á raðgreiðslum eða í myntkörfulánum. Ég held ég muni sofa rótt í nótt, svo framarlega sem mjólkurverð muni ekki rjúka upp úr öllu valdi, og ef svo verður mun ég tala við kúabóndann í Skagafirðinum og kaupa eina kú og tjóðra hérna í bakgarðinum.

Og yfir í allt annað....
Ég varð kjaftstopp þegar ég kom heim úr skvísuhelginni á sunndudagskvöldið, því á eldhúsbekknum sá ég fornan lykil. Ég þekkti lykilinn strax. Hann er líklega yfir 100 ára gamall af gömlum skáp sem fyrrverandi á og nýttist okkur sem hinn besti barskápur í hjúskapartíð okkar. Lykillinn týndist árið 2001 og er núna búin að flytja 3svar án okkar vitundar. Birna fyrrverandi mágkona og þáverandi og núveranda góð vinkona kom og gisti hjá mér í síðustu viku. Ég skildi hana eina eftir í íbúðinni og hún gróf upp lykilinn á ótrúlegum stað. Held að álfarnir hafi stolið lyklinum og legið á barnum í 7 ár en eru greinilega farnir í meðferð....

Annars tíðindalítið á dalnum.... segir himpigimpigellan...

2008-09-29T18:56:00.006Z

Anyway, skvísuhelgin (former húsmæðraorlof) var stórfengleg. Loðnukeppnin varð hatrömm og lá við blóðug á köflum, en þar sem flokkarnir voru fjórir, var kommúnisku fyrirkomulagi beitt og hver og ein fór heim með sigur í einum flokki. Annars hefði þessi keppni orðið banabiti orlofsins. Bústaðurinn var stórglæsilegur og kunnum við Orkuveitu Reykjavíkur bestu þakkir fyrir húsaskjólið, en skiljum jafnframt ekkert í því af hverju saumavélar, straujárn og hitabyssur eru ekki staðalbúnaður í svona kofum. Brill helgi og ég náði að sauma 2 flíkur, stolnar hugmyndir úr rándýrum design-búðum og Rannveig vinkona veitti mér svo mikinn andlegan stuðning að hún gæti fljótlega farið að kalla sig Dali Lama.

Er skúffuð og langar ofaní skúffu þegar ég hugsa um peninga. Mér finnst bara að Lárus og félagar hefðu átt að seilast ofan í skúffurnar sínar og skila öllum peningunum okkar, í gatið í bankanum. Hvað ætli þeir séu búnir að sækja mörg hundruð milljónir handa sjálfum sér í bankasjóðinn undanfarinn ár.... *dæs* er bara fegin að ég er ekki að tapa neinum peningum, því ég á enga peninga. Áhyggjulaus er auralaus maður, allavega á þessum krepputímum. Heppin ég! Þetta er reyndar einfalda útgáfan af efnahagsástandinu, því við almúgarnir borgum brúsann eins og alltaf þegar allt kemur til alls. Nenni ekki að hugsa meira um peninga, mér finnst það ekkert gaman.

loðpar af fótum....

2008-09-25T12:57:00.005Z

Húsmæðraorlof er í uppsiglingu. Þetta árlega.

Vinkona hringdi, er í tímapressu með að gera klárt. Vinnan er alltaf að þvælast fyrir henni.

Við syncroniseringu varðandi hitting, innkaup og undirbúning uppgötvaði hún að hún ætlaði ekki að eiga loðnu karlmannsleggina í heita pottinum þessa helgi.

Hún átti þá víst í fyrra, að eigin sögn.

Úff.. ég hafði ekkert hugsað útí það. Gæti nú verið gaman að hafa svona eins og eitt loðpar af fótum í bústaðnum um helgina. En meina þá ekta!

En ætli það verði ekki bara mitt loðpar ;o) hef ekki tíma fyrir pedicure og manicure og hairycure.. eða hvað sem þetta heitir alltsaman.... og gott ef ég verð ekki með aðeins skegghýjung líka... það er svo margt og mikið skemmtilegt að gerast þessa dagana að ég hef ekki tíma fyrir "overhalningu"...

.....dæsir skeggjaða konan með loðparsfætur og ætlar þannig í bústað!

PS. af gefnu tilefni og vegna fjölda áskoranna verður efnt til keppni í bústaðnum í eftirfarandi íþróttagreinum:

Bestu loðpars-leggirnir
Loðrotta helgarinnar
Vænsti Krikabrúskurinn
Skeggjaða kúluvarparakonan

Búið að loka á bankaviðskipti :(

2008-09-22T16:42:00.003Z

Það er augljóst að þjóðfélagið ber kreppueinkenni á ýmsum stöðum.
Enn er lokað á bankaviðskipti mín við ákveðinn banka í bænum. Síðan í vor hef ég ekki mátt skipta við bankann, þó vilji minn sé algjör, allavega taka þeir ekki við innleggi frá mér. Er þó nokkuð viss um (sem betur fer) að úttekt væri heimiluð ef líf lægi við. Það þykir mér gott að vita. Fór í bankann áðan og var send öfug út með járnbirgðir í dós. Vegna kreppunnar sem ég lennti í fyrir rúmum mánuði síðan, mun bankinn ekki vilja sjá mig fyrr en í fyrsta lagi í febrúar. Þangað til ætla ég að vera dugleg að borða járnið og mæta galvösk á bekkinn. Blóðbankinn er sá banki sem mér hugnast best.... spurning hvort sæðisbankinn komist á listann einhverntímann... *tíhí*

Annars er það svo margt sem mér liggur í hjarta, annað en blóðið sem dælist útí kroppinn á hverju andartaki. Af hverju heitir svona margt G-eitthvað?
G-mjólk
G-strengur
G-blettur
G-mail
Þetta eru allt mjög óskildir hlutir. Reyndar vil ég álíta að G-mjólk sé Geymslu-mjólk og G-mail sé Google-mail, en hitt bara skil ég ekki.....

Legg ekki meira á ykkur í dag.

Eins og gamla konan sagði: "Nú fel ég ykkur Guði á vald, í grátt brókarhald."

2008-09-21T16:49:00.003Z

Hvað segir klósettið þitt um þig? spurði sjónvarpið mig í dag. Ég verð nú bara hvumpin og hvumsa þegar ég heyri svona rugl.

Held að klósettið mitt, bíllinn minn eða bara eldhúsvaskurinn minn segi nákvæmlega ekkert um mig sem persónu.

Klósettið mitt er standard klósett, mjög ópersónulegt, og enn hef ég ekki fundið hjá mér þörf til að skreyta það með persónulegum hlutum, nema þá bara um stundarsakir áður en sturtað er niður. Bíllinn minn er líka mjög ópersónulegur. Ef kíkt er inní hann segir hann heldur ekkert um mig, ekki frekar en ópersónulegi eldhúsvaskurinn minn eða skúringarfatan.

Voðalega getur svona rugl farið í pirrurnar á mér....mun ekki kaupa þennan klósetthreinsi sem verið var að auglýsa.... *dæs* ef þetta er það eina sem veldur mér hugarangri, þá hlýtur lífið að vera býsna gott?!!

2008-09-19T07:54:00.004Z

Munið þið eftir dönsku "gærunni" úr Stellu í orlofi?

Ég tók smá "gæru" móment í gær...... frekar fyndið. Held ég útskýri það ekkert nánar! Lokið bara augunum og sjáið þetta fyrir ykkur.

Hraða-máttur óskast...

2008-09-17T08:30:00.004Z

Dofri minn er ekki mikill morgunmaður og veit ekkert betra en að kúra eins lengi og hann getur undir sænginni.

Við stöndum í forstofunni og ég OFURmamman bíð eftir honum. Tek það fram að ég var mjög ítrekað búin að segja honum að haska sér.

Dofri: "mamma, af hverju ertu að horfa svona á mig?"

Ég: " ég er að bíða eftir þér, geturðu kannski flýtt þér svolítið?"

Dofri: "ég er að flýta mér mamma, vertu róleg, ég er ekki með HRAÐA-MÁTT!!"

*Dæs* stundum getur tekið á þolinmæðina þegar aðrir heimilismeðlimir hafa engan ofurmátt á morgnana.

2008-09-16T09:49:00.006Z

Enginn til að berja úr mér barlóminn þessa dagana, svo ég hef ákveðið að refsa mér harðlega og nú er ég búin að hjóla í ausandi rigningu út um allan bæ síðustu daga. Besta geðlyfið er víst að hreyfa sig, og sem iceing on the cake hefur verið úrhelli, þegar ég hendist um bláa hjólinu sem er sérstaklega hressandi. Kom heim í gær og leit út eins og kona á fertugsaldri (sem ég jú er) í blautbolskeppni (sem ég var ekki). Gegndrepa svo hægt var að vinda úr öllum plöggum.

Heitt te, ullarsokkar, þurr föt og teppi á sófa eftir svona hjólatúra er það besta sem ég veit.... en óskaplega hlakka ég til þegar bíllinn minn verður tilbúin úr viðgerðinni ;o)

Bar-Lómur? Er það ekki bara Róna-fugl?

Ps. tek það fram að ég er samt edrú.....þó það sé stundum Bar-Lómur í mér þessa dagana...

Trist....

2008-09-14T21:43:00.002Z

Mamma, ekki gráta mig, ég veit þú saknar mín.
Mig langar að vera hjá þér og þerra tárin þín.
Ég fékk aldrei að sjá þig og blíðu brosin þín,
Guð vantaði lítinn engil og kallaði mig til sín.

Segðu pabba að ég elsk´ann því pabbi á líka bágt,
faðmaðu hann fyrir mig og hvíslaðu ofurlágt.
Segð´onum frá stjörnunni sem á himnum skærast skín,
kennd´onum að þekkja hana því hún er stjarnan mín.

Núna áttu lítinn engil sem vakir yfir þér,
ég passa líka pabba, segðu honum það frá mér.
Það eru hér svo margir sem þykir vænt um mig,
fjöldi fallegra engla sem gæta mín fyrir þig.

Tendraðu lítið kertaljós til að lýsa þér til mín,
láttu á leiðið mittt hvíta rós, það læknar sárin þín.
Þegar sorgarinnar skuggi dvín, þá muntu minnast mín
og tár þín verða gleðitár því ég verð ávallt þín.

aaahhh...... hvað ég er marinn og blá í kvöld......og þetta ljóð á einstaklega vel við tristu stemminguna.

nýsjálfranskt-íslenskt kvöld

2008-09-13T13:43:00.005Z

4 geðsjúklingar komu saman frá 2 þjóðlöndum, og borðuðu mat frá 3. þjóðlandinu. Ein festist ekki á filmu svo engar heimildir eru fyrir þátttöku hennar í franska kvöldinu og því mun hún að öllum líkindum fá að kaupa tryggingu fyrir geðsjúkdómum.

Fordrykkir, franskar pönnukökur, rauðvín, ostar og "bráðum" heimsfræga rifsberjahlaupið enduðu í þörmum okkar stallsystra og jafvel á börmum og mjöðmum ef til lengri tíma er litið.

Laglegi lögreglumaðurinn á efri hæðinni kom því miður ekki niður og handtók okkur eins og plön voru uppi um, þrátt fyrir ítarlegar tilraunir til óspekkta. Merkilegt hvað vel vaxnir menn í einkennisbúningum geta gert fyrir miðaldra þreyttar húsmæður. Ef mig minnir rétt þá bjuggum við til marengsbrjóst með rjóma og kirsuberjum og settum fyrir framan hurðina hjá honum í nótt. Með ástarkveðjum.......

What a night!!

2008-09-11T20:10:00.002Z

Varð vitni af því þegar kartöflur voru settar í póstkassa hjá konu á áttræðisaldri. Væri etv. vítavert ef ÉG hefði ekki fengið þessa glimrandi hugmynd og frúin sjálf framkvæmt hana.

Ekki Svíagrýla heldur ljúfur maður Andreas að nafni brúkaði gestarúmið í fyrrinótt. Það væri ekki frásögu færandi, nema hvað ég held ég hafi sent berfættann mann til Svíþjóðar á jarðarför, því einhverjir ókunnugir karlmannssokkar lágu á stofugólfinu þegar ég kom fram í gærmorgun.

Annars þykir mér alltaf dáldið merkilegt þegar fólk finnur knýjandi þörf á að klæða sig úr sokkum í stofusófanum fyrir framan sjónvarpið eða á öðrum stöðum fyrir utan svefnherbergið eða baðið. Get fullvissað ykkur um að Andreas er ekki eini maðurinn sem ég þekki sem hefur "fetis" fyrir þessari athöfn. Á góðan vin gengur um allt hús og hirðir upp sokkaplöggin eftir konuna sína! *Dæs* og ég hef bara fetis fyrir skóm með spennum!

Farin út í gönguferð.... í sokkum og skóm!

2008-09-10T19:03:00.006Z

Dagur andlegrar heilsu var haldinn hátíðlegur hjá mér í dag. Lagði mig í latastrák hjá vitru konunni í smá stund og gerði sálarhreingerningu. Syndaaflausnir fást ekki í Kjörgarði ennþá, og er það gott, því ég hef líklega ekki efni á svoleiðis lúxus, að eyða í svoleiðis er bruðl og í Bónus er ekkert bruðl, heldur ekki í Kjörgarði.

Eftir sálarhreingerningunna fór ég og hreinsaði rifsberin af trjánum hjá Fjólu vinkonu og fór heim og bjó til þetta líka dýryndis rifsberjahlaup. Endurbætti uppskriftina dulítið og laumaði aðeins papriku og chilli útí pottinn þegar húsálfarnir sáu ekki til. Nú bíð ég spennt eftir því að vita hvort hlaupið hlaupi. Og ef ekki þá mun ég kenna Fjólu um ómögulega uppskrift og hún mér fyrir að hafa eyðilagt uppskriftina hennar mömmu með papriku og chilli. En hlaupið bragðast vel, hvernig sem stífelsið mun verða.

2008-09-09T10:39:00.004Z

Undarlegir hlutir hafa gerst, gærkvöldið og nóttin voru uppfull af dularfullum atburðum og uppákomum.
Ég fékk karlmannsgest (já takið eftir) karlmannsgest ...tíhí.... í heimsókn í gær, sem ég ætlaði að rótbursta í "scrabble" en rétt náði að merja sigur á síðustu metrunum, vegna óhagstæðrar spilavindáttar er ég viss um.
Svo þegar ég var að skríða mér inní rúm heyri ég að ísskápurinn minn er að fara að takast á loft, það heyrast svona vélargnýs hljóð í honum, eins og í þyrlu eða jafnvel geimflaug, og í nokkrar sekúntur stend ég á náttfötunum fyrir framan ísskápinn og horfi á hann (það gerist reyndar reglulega, en þá er ég að reyna að standast freistinguna að stökka inní hann svona rétt fyrir svefninn) og býð eftir að hann springi eða fljúgi. En ekkert gerist! Þá trítla ég mér inní rúm og fer á fund Óla L. (ekki Óla F!), en hann er hundleiðinlegur og um miðja nótt vakna ég með hausverk dauðans og skrönglast fram hálfmeðvitundarlaus í leit að lyfjaskápnum og byrja á baðherberginu og kveiki ljósið. Þá fæ ég flugeldasýningu og peran á baðinu springur með miklu ljósasjóvi og hávaða. Hjartað og hausinn dóu að hluta, og í geðshræringu miðaldra húsmóður dröslast ég í eldhúsið, finn lyfjabaukinn og dúndra í mig allskyns pillum, bleiku, hvítum, litlum og stórum. Svo dó ég inní rúmi, þar til klukkan hringdi í morgun. Í dag velti ég því fyrir mér hvort þetta hafi alltsaman verið ofskynjanir??!!!

PS. Sekúntur eða sekúndur, er ekki norðlenska að skrifa sekúnTur...?

ég ætla að minna þig á að minna mig á....

2008-09-08T14:57:00.004Z

Tónó byrjar hjá Dofra í dag og kennarinn hringdi og boðaði hann í tíma kl. 16.

Ég heyri í Dofra og segi honum að muna að fara í tónó klukkan fjögur.

Hann segir "mamma, ég er ekki viss um að ég muni það, viltu ekki minna mig á tímann og hringja í mig þegar ég á að leggja af stað?" Við sannmæltumst um það og ég sagði símanum mínum að minna mig á að minna Dofra á að fara af stað á réttum tíma.

Núna var hann að hringa í mig. "mamma, ég ætlaði bara að minna þig á að minna mig á að fara í tónó á réttum tíma!"

....þessi elska....

P.s. Ég hef ekki trú að að þessi tími gleymist ;o)

2008-09-04T13:26:00.002Z

Var að spjalla við kunningja minn áðan. Honum finnst rómantískt að bjóða elskunni sinni í lautarferð með sviðakjamma undir hendinni!

Ég get engan veginn verið sammála honum, allavega ekki þegar kemur að sviðakjammanum.

"Kjammakoss"hljómar ekki vel.

2008-09-02T13:30:00.003Z

Fortíðardýrkun - Nútíðin í fortíðinni.

Mér finnst eitthvað flott við þetta look, nema stelpan sé bara svona skemmtileg á myndinni.

Það þarf ekki mikið til að gera mig glaða suma daga ;o)

Ps. hársrótin er dáldið skrítin, eins og á Naomi Campbell.

2008-09-01T14:22:00.002Z

Ég og Dofri fórum með margföldunartöfluna í berjamó í gær. Það gekk vel. Komum heim með bláber sem notast skulu í berjaköku ;o)

2008-09-01T08:15:00.003Z

Jarðhræringar og náttúruhamfarir láta eitthvað á sér standa, þrátt fyrir fögur fyriheit. Vilníusarsleikurinn er líklega nær dauða en lífi og nú er svo komið að sem bókara finnst mér ákveðið óvafnvægi á milli debet og kredit. Líklega komin tími á afskriftir! Þarf aðeins að ræða við endurskoðandann, hvort að við getum afskrifað að fullu eða hvort heimild sé eingöngu til hlutaafskrifta. Held að það hljóti að vera í lagi að afskrifa að fullu, þar sem viðkomandi telst nú ekki til fastafjármuna, er kannski svona lausafjármunur, eða meira að segja ekki einu sinni fjármunur! Kannski var hann bara meira svona heimalán, eins og bók af bókasafni, rétt til að glugga í. Voðalega verð ég pirruð þegar ég kemst alltaf að því sem ég hef haldið, að karlmenn séu froskar. Það er allt vaðandi í froskum í kringum mig, og ég geng votlendið uppí klof í vaðstígvélunum, og er farin að þrá það að komast á þurrt land!

2008-08-30T19:16:00.002Z

Ég hef farið hamförum í sósíallífinu sl. viku og tók lokahnykkinn í dag.
Fór með "honum sem ekki má nefna" á tónleika með Stórsveit Reykjavíkur sem framreiddi Bjarkartónlist á silfurfati.
Björk er snillingur (kannski líka laumu djassari) og stórsveitarútsetningarnar settu engan útaf laginu, þannig!
Guð hvað ég var feginn að Rannveig var ekki með mér. Hún hefði líklega gengið út.
Ég fór ekki út fyrr en ALLT var búið.
Nú brosi ég hringinn, er södd menningarlega og félagslega og hjartakitran er nokkuð sátt, þrátt fyrir að bágtið mitt sé nú enn ekki alveg gróið.

Trúnó...og kindastúss

2008-08-29T17:27:00.004Z

Ég fór á "trúnó" í Fríkirkjunni gærkvöldi með Gísla æskuvini mínum.

Aahhh... Algjört eyrnakonfekt. Tómas R. og Ragnheiður Gröndal fóru á kostum ásamt hinum hjóðfæraleikurunum. Djass er tónlist fyrir athyglissjúklinga (lesist á góðan máta) því sólóistarnir í bandinu eru svo margir. Skemmtileg tónlist og ég er ekki frá því að ég hafi heyrt einhverja kúbansk-lattinameriku áhrif í sumum lögunum og munaði mjóu að við Gísli stykkjum út á gólfið og brystum í dans. Við rétt náðum að hemja okkur, enda ekki viðeigandi þegar maður er á "trúnó" í kirkju.

Dofrinn minn er veðurtepptur heima hjá mömmu sinni og líklega verður ekkert af kindastússi af hans hálfu um helgina. Enda segist hann nú ekkert þekkja markið hans afa síns, þannig að hann sé nú ekki nema hálfdrættingur í réttunum. Honum langar eiginlega meira í afmælið hans Þorsteins vinar síns.....svona gaurar...

2008-08-28T17:53:00.004Z

Svefn hinna menningarsnauðu hefur ekki truflað mig síðustu daga. Handboltalandsliðið hefur heldur ekki truflað mig, nema ég truflaðist smá þegar ég heyrði að við hefðum eytt 70 milljónum í HSÍ og einhvern afrekssjóð barna! Þó að Íþróttamálaráðherra telji að við Íslendingar stöndum í þakkarskuld við handboltamennina, þá er ég henni hjartanlega ósammála. Ég held bara að ég sé í engri skuld við þá, frekar þeir við mig eftir þetta fjáraustur!

Er búin að stússast aðeins með hana ömmu mína, 87 ára sem segist vera hætt að dansa "hoppsa-daisy". Held þó að hún laumist örugglega til að taka örfá spor í eldhúsinu þegar engin sér til. Hún er eins og Mary Poppins í hreyfingum, og ég beið alltaf eftir því að hún myndi fara að svífa upp á regnhlífinni.

Ég bauð bláókunnugri konu í mat í gærkvöldi ásamt þekktum bróður sínum og þetta var ljómandi skemmtilegt kvöld, þar sem allt var látið flakka og mikið hlegið. Hugsa bara að ég endurtaki leikinn við tækifæri, nema hvað að þá verður hún ekki bláókunnug lengur. Ég hef gaman af ánægjulegu fólki.

**hér kemur svo slúður fyrir Pálínu og alla hina**

Óþekkti stalkerinn virðist bara vera til á tölvutæku formi og Vilníus-sleikurinn er kominn aftur í bæjinn. Ég mun gefa ykkur nánari update, ef eitthvað óvænt gerist. Hef það dáldið á tilfinningunni að jörð muni skelfa fljótlega og endalaus ævintýri séu í uppsiglingu, og ef ekki, þá mun ég að sjálfsögðu búa þau til. Það er ekki á vísann að róa með neitt.

Þjóðmenning og hvað veit ég...

2008-08-24T14:56:00.004Z

Til að bæta upp menningarleysið á heimilinu í gær, fórum ég og Dofri á Árbæjarsafn í dag. Dofri var að syngja þar íslensk þjóðlög ásamt fleiri krökkum, og við sáum fólk spígspora um í íslenskum búningum, (konur með gyðingahúfur á hausnum sem gardínudúskar héngu í) og dansa íslenska og tékkneska þjóðdansa. Þetta var alveg ljómandi dagskammtur af menningu fyrir okkur mæðginin. Í næstu viku ætla ég að halda áfram menningunni og skella mér á jazztónleika. Helst tvenna ef ég fæ einhverju um ráðið. That's the plan!

há- og lágmenning

2008-08-23T16:37:00.002Z

Hér verður stunduð menningarstarfsemi í dag. Finn mig engan veginn í ringningu og roki niðri í bæ og svaf yfir mig í efnafræðitilraunirnar í Erfðagreiningunni. Þannig að í tilefni dagsins leigðum ég og Dofri DVD myndir og ætlum að slengja okkur á sófann. Myndir bæði fyrir háa og lága, er það ekki há- og lágmenning?
Er komin í náttbuxurnar og Dofri er að búa til Soda Stream-ið ;o)

Munstrum okkur svo í matarboð síðar og kíkum á flugeldasýningu. Mér finnast menningarnætur ljómandi skemmtilegar, einkanlega þegar gott er veður.

samtíningur

2008-08-22T20:15:00.002Z

Hafið þið tekið eftir því hvað Jóhanna Sigurðardóttir félagsmálaráðherra er sjaldan í fjölmiðlum, svona miðað við aðra ráðherra ríkisstjórnarinnar? Mér finnst það benda til þess að hún sé upptekin við að sinna vinnunni sinni. Held að fleiri ráðherrar mættu fara að ráði hennar.
Annars er það tvíbent, því kostnaður ríkisins eykst í hlutfalli við vinnuframlag þingmanna, og það virðist sem að því meira sem þeir vinna, því oftar klúðra þeir hlutunum. Kannski er bara best að þeir taki sér svona löng sumar-, jóla- og páskafrí eins og þeir gera = færri skandalar og lægri kostnaður.

Mér fannst Dorrit æðisleg þegar hún sagði eftir handboltaleikinn " Ísland er stórrasta land í heimi" eða eitthvað í þá áttina. Hvar gróf hann Óli þessa konu upp? Held það gæti verið gaman í húsmæðraorlofi með Dorrit, en verð líklega að láta mér nægja orlofið með "hinum" stelpunum.

Ég er ekkert mikið fyrir aumingjaklám en á það til að detta á sófann með Dr. Phil. Komst að því í dag að konan hans Larry King finnst mikilvægt að foreldrar eyði 15 mín á dag með börnum sínum t.d. áður en þau fara að sofa.....held hún hafi verið svo upptekin að sinna börnunum sínum í 15 mín á dag að hún hafi alveg gleymt að borða stúlkan. Jibbý segi ég nú bara. Held hún fái ekki fálkaorðuna fyrir barnauppeldi, allavega ekki frá mér.

...og að lokum...

grátandi karlmenn, það er eitthvað við grátandi karlmenn, sá í fyrsta skipti í dag heilan flokk af grátandi karlmönnum og mig langaði til að hugga þá ALLA!!! Áfram Ísland.

Girls talk...

2008-08-21T17:43:00.002Z

Kolla: hvernig er heilsa þín dúllan mín í dag?

Vinkonan: spægilpylsa og kók í morgunmat - gæti ekki verið betra

Kolla: hollt og gott...

Vinkonan: ummm jammm - hvernig hefurðu það - ?

Kolla: jú bara bærilegt... fékk mér svefntöflu í gærkvöldi og náði að sofa vel í nótt..

Vinkonan: ummmm nammm dóp ......... svefntafla og morfín - kætir og bætir - ætla að verða dópisti í næsta lifi

Kolla: ég líka... he..he.. pillufíkill

Kolla: held ég þurfi bara að fá mér smá rómans.. og lyfta mér upp...

Kolla: eini gallinn er að ég er ekki alveg upplögð.. lol..

Vinkonan: jaaaa hljómar vel

Kolla: það hlýtur að koma... þá segi ég þér djúsí sögur...

Vinkonan: uhhhh gaman

Vinkonan: ohhh lánaðu mer kynhvöt - mín er föst í fylgunni

Kolla: ójá.. mín þvælist bara fyrir mér...þú mátt fá'ana, er að reyna að hemja hana

Vinkonan: mohhhhhh misrétti

Kolla: Lostinn hefur nú komið mér í ógöngur... líttu bara á X málið..

Vinkonan: ógöngur .... nei held ekki. var ekki gaman að vera ólétt í 12 vikur

Vinkonan: vita að þú gætir þetta og dreyma um framtíðina

Kolla: það var æðislegt

Vinkonan: ég mæli með meiri " drusluhætti" - bara gaman og geggjað ef það verða lifandi vitni úr þeim tilraunum

Kolla: heyrðu... Dofri verður hjá paa sínum í næstu viku.. fer og kyssi einhvern strák þá og læt þig vita hvernig verður...

Vinkonan: lol hljómar vel .......

Vinkonan: ummm - í þeim töluðu orðum fer kerlinginn að brjóta saman þvott og skúra (gaman)